World Cancer Day hman a ni
Nimin khan World Cancer Day a ni a, Aizawlah pawh National Programme for Prevention & Control of Cancer, Diabetes, Cardiovascular Diseases & Stroke (NPCDCS) bultumin Assembly Annexe conference hall-ah Health & Family Welfare minister Dr R Lalthangliana hoin hman a ni.
World Cancer Day puala inkhawm hi National Health Mission (NHM) director Dr Rozama'n a kaihruai a; Dr R Lalthangliana chuan, cancer lama Mizoram dinhmun ṭhat lohzia mipui hrilh chian lehzual a ngaih thu sawiin, "Cancer campaign beihpui thlak tur hian NGO leh kohhrante engtin nge kan hman ṭangkai ang tih ngaihtuah a ngai. Ngaihtuahna ka sen tlàn a ṭul," a ti.
Health Minister chuan, hriselna ṭha zawk neih theihna atan ṭan rual a ngaih thu sawiin, "Kan ṭan rual chuan he department hi awmze nei zawkin kan kalpui theiin ka ring. Cancer vanga thi engtin nge kan tih tlem ang ngaihtuah a ngai a ni," a ti a; tumna tak tak nena hma lam pana kal a pawimawh thu a sawi.
Health sector-ah thil pawimawh pathum a awm tih sawiin Minister chuan, "A hmasa berah chuan, nat tawh hnua sum tam tak sên a ngaih lohna turin inven a pawimawh a, pahnihnaah chuan damlo enkawlna lama ṭan lak niin, pathumnaah chuan infrastructure lama hmasawn a ni. Tun dinhmun aia ṭha zawka kan awm theihna atan hmalak a ngai," a ti.
Dr R Lalthangliana chuan, Mizorama department hrang hrangah Health department a pawimawh bera a hriat thu sawiin, "Mi nunna pawtseitu, mi tidamtu kan ni," a ti a; Health & Family Welfare department chu a pawimawh em avangin, post ruak, a pawimawh tak tak chin chu hnawhkhah theih loh a awm tura a ngaih loh thu a sawi.
Health principal director Dr F Lallianhlira pawhin thu sawiin, health subject chu state mawhphurhna a nih thu a sawi a, "Central dem ngawt theih a ni lo, state-in a tih tur a tih char char a ngai," a ti.
Dr F Lallianhlira chuan, Mizote'n cancer an vei chhan tam tak chu ei leh in vang a nih thu sawiin, "Cancer vei theihna thil chi hrang hrang kan ei leh in ṭhinah a tam. Hetiang hi engtin nge kan tih reh ang tih ngaihtuah a ṭul," a ti a; cancer chu Mizote'n an cho chhuah a an lek lek thu a sawi.
World Cancer Day hmannaah hian NPCDCS state nodal officer Dr Eric Zomawia'n cancer leh a vên dan a sawi a; Mizoram State Cancer Institute-a medical oncologist Dr Jeremy L Pautu-in World Cancer Day thupui, 'Ka ni a, ka thei a ni' tih awmzia leh a ṭangkaina a sawifiah thung.
Inkhawma tarlan anih danin, Mizoramah tun hnai kum thum chhungin cancer ve thar mi 4656 hmuh chhuah a ni a, kumtin cancer vei thar 1152 hmuh chhuah ang a ni. Kum 3 chhung hian cancer vang mi 1152 in nunna an chan.