Aguero lakah Arsenal tlu sawp

Sergio Aguero-a'n Arsenal lakah goal thum khungin Manchester City 3-1 chu in hnehna a chanpui. Pep Guardiola nauten Premier League champion zia an chhuah a, hmahruaitu Liverpool tan ring takin ralkhel dar an khawng ri nghal bawk.

Pathianni zan Etihad Stadium-a inkhelah Man City striker Aguero chu 'changtupa' a ni a, mikhual lam tana captain Laurent Koscielny goal khungin kawngro a su lo. Citizens hian Liverpool an phak lohna chu point hnih a ni, mahse nizan khan Reds hian West Ham an hneh a nih chuan a danglam leh thei.

Manchester City striker Aguero-a'n Arsenal laka a goal hmasa ber khung turin second 46 bak a mamawh lo, Argentina international hian defender Aymeric Laporte hnen aṭanga a ball hmuh chu hnai takah a tauh lut nghal - France defender laka holam taka ball hlohtu Alex Iwobi khan an lama goal a luh chiah khan a tihsual pawi zia a hre chhuak ang.

Arsenal lamin corner aṭangin minute 11-naah an sut hlauh, defender Nacho Monreal tauh pial nang fuhtu Koscielny lu aṭanga ball chhuak chu City keeper Ederson tan dan hman a ni lo, ball chang tlem mah se Unai Emery nauten season ṭan nia an ngam loh lakah beiseina nung an nei chhunzawm.

Mahse, chawlhlawk hma chiahin Aguero bawkin Raheem Sterling-a ball pek a khung, England international tana ball pet kang zeuhtu Ilkay Gundogan thiamna hmuh hmaih theih a ni lo, ball kang lai vawi khata cross nghaltu Sterling hnathawh a nep lo hle bawk. Reds forward hlui bawk hian second half-ah Argentine striker tan goal a siamsak leh bawk. 

Kum 1992 aṭanga Premier League tih a nih hnuah vawi 11 ngawt hattrick siam thei Alan Shearer chu record nei ṭha ber a ni a, Gunners laka goal thum khungtu City number 10 Sergio Aguero-a'n vawi 10 a nei tling ve ta - anni pahnih chiah hi vawi 10 nei tling thei an la ni.

Argentine striker hi kum 30 mi ni tawh mah se tharum a la ngah a, ball channa tur hmun a hriat bakah a che rangin a huaisen bawk; khingpuite box chhungah world class striker a nihna a lan chhuahtir zel avangin Shearer-a record hi a khum a nih pawhin a mak lo ang.

Man City tana league match 227 khelh aṭanga goal 157 a khung hi club record a ni nghal zel a, hun tawp dawna Gabriel Jesus-a'n a rawn thlak pawhin entu mipui chu amah chawimawi nan an ding. Aguero chuan, "Tun ṭumah hian number 10 ka ni, ka lawm takzet," tiin a sawi.

Arsene Wenger-a'n Premier League-ah pangana ni chungin Arsenal a chhuahsan a, amah thlaktu Unai Emery tan palina nihphak chu hna pawimawh hmasa a ni a, chumi tur pawh chuan team ṭha dang an tam tawh avangin team din thar chu a mawhphurhna a ni bawk.

Arsenal player neih lai zinga hlawh hnem leh ṭha bera ngaih Mesut Ozil lakah Spanish manager hian rinna a nghat ngam lo a, season tawp a chhuak tur Aaron Ramsey tel lo a khelh an zir a ngai bawk - player pahnih hi bench-ah dah an ni a, player thar Denis Suarez-a'n danglamna a thlen rih lo.

Hliam tenau neih vangin midfielder Granit Xhaka a inlan thei loh zanah Matteo Guendouzi leh Lucas Torreira te khel ṭha thawkhat mah se City ball thiam rual karah tihsual an nei leh zauh ṭhin, tlarhma a awm Pierre-Emerick Aubameyang leh Alexandre Lacazette te tana ball ṭha an pet chhuak thei lo.

Gunners manager Emery chuan, "City khan minute 90 chhung an ṭhat bik zia an lantir a, kan danglamna chu result khan a lantir. Thinrim lutuk tur a ni lo, match lehpeka hnehna kan chan theih nan kan thawkrim chhumzawm tur a ni ang," tiin a sawi.

Kum 47 mi Emery hian Man City chu team ṭha zawk an nih zia a pha lo, khelmuala lut tur fawmkhawm chawp a ngaih laiin; a khingpui tur Guardiola erawhin bench-ah Leroy Sane leh Riyad Mahrez te a la dah thei - duhthlanna hman dan tura an luhai dan a thuhmun rih lo a ni.

Manchester City hian Nilaini zanah Everton an hmachhawn zui dawn a, kar tawpah Chelsea an mikhual zui dawn bawk - Champions League, FA Cup leh League Cup-ah an la dam bawk avangin match khelh tur an ngah.

Spanish manager Guardiola chuan, "Newcastle kan hneh loh hnu khan kan lakah pressure a sang zual, kan elpui Liverpool an chak zawh loh avang khan tlemin a zia deuh, tunah chuan Reds pawh chesual thei an nih zia a lang tawh," tiin an elpui Liverpool chungchang a sawi lang.

Barcelona leh Bayern Munich manager hlui chuan sawi zawmin, "Everton hmachhawn turin kan inbuatsaih nghal ang, chumi hnuah Chelsea a nih zui avangin chawlhkar hautak tak a ni dawn, match indawtin ngaihtuahna kan seng ang," tiin a sawi.

Manchester City hian kum 1937 April thla hnua a vawi khat nan Arsenal lakah a zawnin match li hnehna an chang thei a, kumin bikah match kua an khelh zinga ṭum riatah hnehna an chan theih avangin Pep-a naute hian nomawi pakhat aia tam nen season an khar a nih pawhin a mak hran lo ang.