Sala thlawhna an hmu chhuak
Cardiff City footballer bo Emiliano Sala leh pilot David Ibbotson-te chuanna thlawhtheihna chhia chu hmuhchhuah a ni a, hetihrual hian khawvel ngaihven Sala leh a pilot te ruang hmuh tel a ni lo.
Sala hi thlasik transfer-ah Cardiff chuan an player manto ber ni turin an lalut a, January 21 khan Nantes, France aṭangin Cardiff hi an pan a, an chuanna thlawhtheihna Piper Malibu N264DB chu chin hriat lohin a bo zui a ni.
Argentine striker Sala-te zawn hna thawktu David Mearns chuan, "Ka sawi thei chu tuipui chhung thuk takah he thlawhtheihna keh chhia te hi hmuh a ni, tih hi a ni. Thlawhtheihna them ṭhenkhat hi tuipui 63m vela thuk chhungah kan hmu a, a registration number kan hmu chhuak a ni.
"Mak deuh mai chu he thlawh-theihna chhia zawng zawng deuhthaw hi hmun khatah a awm a ni," a ti a, an hmuhna hmun hi thliarkar Guernsey chhehvelah a ni.
Tun dinhmunah chuan David Mearns te hi an chawl tawh dawn a, Air Accidents Investigation Branch (AAIB) lam chuan hna an thawk chhunzawm ve tawh thung ang.
Sala pa Horacio chuan, "Kei chuan ka awih thei lo. Mumang mai, mangchhia mai ni se ka ti a, ka hrethiam thei lo a ni," tiin an hun tawn mek chu rapthlak a ti a, mumang ang maia harhsan theih ni se a ti hle.
A tawp ta
Sala te zawn hna hi a tir lamah ni thum zawn a nih zet hnuah hmuh a ni lo a, Guernsey Police lam chuan zawn hna an chawlhsan tawh tur thu an puang.
Mahse, khawvelin Sala te sulhnu engmah hmu loa zawn hna tawpsan a ni mai tur hi an hrethiam lo a, mipuiin pawisa £280,000 thawhkhawmin a zawn hna hi thawh ṭan leh a ni.
Mearns chuan, "Kan hna chu kan hlen tawh a, tunah chuan AAIB kutah engkim kan hlan tawh ang. Sala chhungkua ka rilruah an awm reng a, kan theihna sang ber kan hlan a ni.
"An duh ang takin hna kan thawk zoah ka ngai a, rilru hrehawmin hnual viau mah se kan thinlunga zawhna awmte chu chhan a ni tain ka hria," a ti.
Marine scientist David Mearns hi tuipuia chhiatna thleng, mak leh langsar tam takah rawih a lo ni tawh ṭhin a, khawvel history-a pawimawh tak tak 20 lai a lo hmu chhuak tawh.
Sala chanchin a hriatin a zawn hna thawk tur hian a inpe a, tunah chuan a tira an hmuh loh thlawhtheihna chu zawn hmuh sakin a hna a hlen leh ta.