Olympic qualifier khel tur Jeremy

India tana Youth Olympic Games gold medal la hmasa ber Mizo weighlifter Jeremy Lalrinnunga chu senior huangah a inlan ṭan dawn, 2020 Tokyo Olympic a inlan tumin qualifier a khel dawn a ni.

Olympic-a inlan thei tur hian 2020 April thla a world ranking-a a sang pariat zinga tel phak a ngai dawn, ranking sang tur chuan inelna an hmachhawn hnem a ngai dawn. Tun ṭuma Jeremy-a te telna tur hi 2019 EGAT's Cup International Championship niin, February 7-10 chhung hian Chiang Mai, Thailand-ah neih tur a ni ang.

Govt Complex rawlthar Jeremy hian Youth Olympic-ah khan 62kg category-ah gold a la, tun ṭuma hian 67kg-ah a inlan ang. Senior huangah Jeremy hian tun hmain a la khel ngai lo, mahse an category bikah hian India senior player zingah a record tluk an awm loh avangin Indian Weightlifting Federation chuan a thlang.

India aiawh turin Mizo rawlthar Jeremy bakah hian weightlifter dang mipa panga leh hmeichhe pathum thlan an ni a, vawiin hian inelna neihna tur hmun panin India an chhuahsan.

Khelo India Youth Games gold medalist Jeremy chuan, "Olympic khelh phak hi ka duhthusam a ni a, tunah chuan zin kawng kan zawh chho ṭan ta. A tak ram thleng tur chuan kawng a thui dawn hle a, ka inbuatsaihna ang a hlawhtlin theih nan theihtawp ka chhuah ang," tiin Vanglaini a hrilh a, Mizo mipui ṭawngṭaipuina a dil bawk.