Morata hoin Atletico an tlawm nghal!

Atletico Madrid striker thar Alvaro Morata tan mangchhia a reh thei lo - Spanish striker-in a club tana match hmasa ber an khelhah 0-1 in an tlawm.

Pathianni zan khan Madrid khaw club hian khualmualah Real Betis an lenchilh a, 0-1 in an tlawm a, Barcelona hnaihna hun ṭha an neih remchan chu an chhawr thei lo. 

La Liga hmahruaitu Bar­­ce­­lona hian Inrinni zan khan Valencia chu 2-2 in an inhneh­tawkpui a, Atletico tan result lawm­awm a ni. Mahse, Diego Sime­­one-a nauten point thuma Barca an hnaih theihna hun an bawh­­pelh a, an ui vawng vawng ang.

Pathianni zan La Liga inkhel dangah Real Madrid chuan 3-0 in Alaves an hneh a, season thara Champions League khel turin an dinhmun an sawhnghet zel. 

Kum 26 mi Alvaro Morata hian Real Madrid-ah a beisei ang hmun a chan theih loh avangin kum 2017 khan Chelsea a pan a, Stamford Bridge a pan hmaa a season hnuhnung berah hian goal 20 ngawt a khung avangin a lakah beiseina a sang a, a man pawh pound maktaduai 60 ngawt a ni. 

Mahse, Spain international hian Blues-ah beisei a phak lo. A season hmasa berah match 48 khelin goal 15 a khung hram a, tun season-ah match 24-a goal kua a khung hnuin Atletico lamah hian an kaltir.

Morata-a'n beiseina sang tak nen an ram pan mah se a match hmasa ber erawh a beisei ang a ni lo chiang hle - a goal khung loh hi chu sawi bo theih a la ni a, an tlawm kher hi Morata tan a na zual ang. 

Real Madrid leh Juventus tana nomawi lian tham chawi kim vek tawhtu striker hian goal-ah vawi li zet chu pet goal tumin shot a nei a, mahse Atletico tan a khel tluan chungin mamawh chhanna a ni thei lo. 

Diego Simeone player-ten hneh­na an chan chuan La Liga champion an sawi ri leh ngam tawh ang tih inhre mah se an beisei angin goal an zawng hmu thei tlat lo. 

Atletico chhuanvawr An­toine Griezmann chu hun nei ṭha bera chhal ngam a ni a, mahse French forward hian second half-ah post a pet per - an vanduai tia sawi theih a ni. 

Betis zawk hian minute 65-naah penalty hmangin goal an khung a, Atletico defender Filipe Luis chuan penalty area-ah a kuta ball a khawih fuh avangin referee-in penalty spot a kawk. 

Mualneitu team tan Sergio Canales chuan penalty hi goal-ah a chantir a, league match 19 chhung tlawm loa an kaltluan hnuah Atletico an tlawm ve ta - hmahruaitu Barca point rukin an thlau mek. 

Real Madrid-in champion sawi ri ngam tawh lo mah se Champions League khelh ngei erawh an tum tih an pholan chhun­­zawm zel a, an mikhual Alaves chu Karim Benzema, Vini­­cius Junior leh Mariano Diaz goal khung hmangin 3-0 in an hneh. 

Santiago Bernabeu-a inkhel­ah tun hnaia khel ṭha tak Benzema chuan minute 30-na lekah goal hmahruai a khung a, a match hnuhnung pali-a goal ruk a khungna chiah a ni - tun season bikah match 35 a khelh tawha goal 18 a khungna chiah a ni. 

Real hian goal an khung hma ngaihtuah erawhin goal dang an nei leh lawk thei lo a, an goal hnihna hi minute 80-naah an khung ve leh chauh!

Mariano Diaz chuan hun pek belhah Real goal thumna a khung a, season hmasaa Lyon tana goal 21 ngawt a khung avanga Real-in an lak let striker hian tun season-a goal hnih a khung ve na chiah a ni. 

Real tan Vinicius bakah Benzema leh Mariano ten goal khung mah se player langsar ber erawh kum 18 mi Vinicius Junior hi a ni a, minute 87-naa lak­chhuah a nihin Real fan-ten ding chungin zahna an lantir hial. 

Brazilian forward hian Julen Lopetegui enkawlna hnuai­ah beisei angin hmun a chang tam tawk lo a, mahse Spanish manager ban a nih hnuah reserve team lama amah hrechiangtu Real boss thar Santiago Solari hnuaiah hmun pawimawh a chang chho. 

Alaves lakah pawh a goal khung piah lamah a che vel chu mit ti tlai tham a ni a, a bik takin second half-a Alaves player pathumin an hual vel kara a ball khawih kual vel chu hmuhnawm tak a ni.