DFB Pokal-ah Borussia Dortmund inlan zan

Bundesliga hma­hruaitu Borussia Dort­mund chu kartawp in­khelah Eintracht Frank­furt nen 1-1 in a inhnehtawk a, zanin dar 1:15 hian DFB Pokal third round-ah Werder Bremen an hmachhawn ang.

Dortmund manager Lucien Favre chuan zanin hian a player neih ṭhat a hahdamtir a rinawm a, khelhna hmun chang tam lo Mario Gotze, Omer Toprak leh Marwin Hit ten khelhna hun an neih a rinawm. Team pahnih hi December thla khan Signal Iduna Park-ah an inhmachhawn a, Dortmund hian 2-1 in Bremen hi an hneh.

German club te knockout hmanga inelna DFB Pokal-ah hian Eintracht Frankfurt chu champion lai an ni a, nikum khan final-ah Bayern Munich an hneh. Tun season-a beisei pha lo Bavarians hian naktuk zan hian Hertha BSC an hmachhawn ve bawk ang.