A vawi khat nan PSG an tlawm

French Ligue 1 match 20 chhung hneh loh nei loa kaltluang thei Paris Saint-Germain chu an tlawm ve ta. Pathianni zan khan PSG hi Lyon lakah 2-1 in an tlawm a, tun season bikah vawi thum an chak lohna chiah a ni.

PSG hian Champions League group match-ah Liverpool an ngam lo a, League Cup-ah Guing­amp an hneh lo bawk - league bikah chuan season hmasa khan an khelmualah Rennes an ngam loh hnua an chak loh lehna hmasa ber a ni chiah.

Chak lo mah se PSG hian an­mahni hnaih bertu Lille lakah point 10 zetin an la sang fal tho, match hnih ngawta an khelh tlem bawk avangin Ligue 1 nomawi an kawl lai chu harsa lutuk loin an humhim ngei dawn niin a lang.

Thomas Tuchel-a nauten inkhel bul ṭan fuh zawkin minute sarihna lekah Angel Di Maria chuan Lyon keeper Anthony Lopes dan hman lohin a khung nghal. Mahse, chawlhlawk hmain Leo Dubois cross keeper Alphonse Areola-a'n a chhut sual avangin an si phurh sut nan Moussa Dembele chuan a tauh lut.

Second half tir lamah defender tawnhriat ngah Thiago Silva-a'n Celtic striker hlui Dembele a tih tluk vangin penalty a chawi a, penalty chhuih tu Nabil Fekir tan chakna goal khung turin harsatna a awm lo - Lyon hian an goal an venhim zui theih avangin point thum hlu tak an hlawh chhuak a, pathumna dinhmun an luah.

Hliam vangin PSG forward Neymar a inlan thei lo a, Bra­zil international awm loh zanah Kylian Mbappe leh Edi­son Cavani ten an hun ṭha neih an chhawr 

ṭangkai lo. France international Mbappe chuan inkhelh banah an buai chhunzawm a rin loh thu a sawi.

Kum 20 mi Mbappe chuan, "Kan chak loh dan kha a mak a ni, first half khel ṭha lo mah ila inkhel chawhnu lamah kha chuan kan thunun hneh hle," tiin a sawi. PSG in­khel hi Champions League-a an hmachhawn tur United manager lailawk Ole Gunnar Solskjaer leh assistant manager Mike Phelan te chuan a hmunah an en.

France international chuan sawi zawmin, "Tuna kan result hian Champions League a nghawng lo ang, match indawtin kan insiamṭha dawn a ni," tiin February 13-a United nen an inkhelh hun tur a thlir nghal bawk.