United-in awm hmun an sawn ta

Manchester United-in manager lailawk Ole Gunnar Solskjaer hnuaiah match 10 chhung khel tawhin hneh loh an la tawng lo. Pathianni zan khan United hian Leicester City chu Marcus Rashford-a goal hmangin 1-0 in an hneh a, Premier League-ah parukna aṭangin panganaah an insawn chho a, palina Chelsea an phak lohna chu point hnih chauh a ni.

King Power Stadium-ah United-in a pawimawh ber point thum hlawh chhuak mah se an khelh danah inchhuang tur an ni lo a, mualneitu Foxes-in point an hlawhchhuah loh avangin an vanduai tiin a sawi theih ang.

Manchester United-in inkhelh ṭantirh lam thunun hretin Rahsford chuan Luke Shaw-a ball vawrh duhthusam chu goal zawnah a tauh thei lo.

Amaherawhchu minute 9-na lekah Foxes defender Ricardo Pereira ball clear sual chu United player zinga theihna sang ber Paul Pogba zawnah kher a kal a, French midfielder hian Rashford tan lak nuam thlapin a vawrh a, English forward hian 'a class' pholan nan hmangin goal kilah chiang zetin a pet lut.

Kum 21 mi Rashford hi Solskjaer hnuaiah a khel ṭha takzet a, league match vawi riat an khelh tawhah goal ruk khungin match hnihah chiah goal a khung lo. English forward hian tun season Premier League-ah goal kua khung tawhin amah siamtu Paul Pogba nen hian club top scorer an ni mek.

Norwegian manager Solskjaer hnuaiah United hian point 24 hmuh theihah point 22 an hmu a, hemi hun chhung bikah hi chuan Premier League club che ṭha ber an ni.

Chutihrualin Leicester nen hian awmze neia goal nawr an nei tam lo a, substitute  Anthony Martial leh Romelu Lukaku ten Foxes keeper Kasper Schmeichel vawi khat ve ve hna an pe tih loh chu an tibuai lo.

Claude Puel naute erawhin second half-ah United an nawr tawm a, Rachid Ghezzal freekick chu keeper David De Gea-a'n ṭha zetin a dang a, Spanish keeper hian Jamie Vardy bicycle kick a dang bawk.

Foxes vanneih zan a ni lo a, hun tawp lama Vardy hlah leh Harry Maguire-a volley te chuan United ṭantute thinphu a tirang khawp ang.  Leicester City manager Puel chuan, "Hun tawp lamah harsatna kan siam a, point hlawhchhuah nan erawh a tawk zo lo," tiin an vanduai thu a sawi.

Manchester United hian Jose Mourinho awm loh hnuah hma an sawn ngei a, amaherawhchu Portuguese manager hun lai ang thoin tlarhnung a la nghing a, an point ni loin an khelh dan thlirin an ṭha tawk lo. Chutihrualin a pawimawh ber result an hlawh chhuak zel a, FA Cup leh Champions League-ah Chelsea leh Paris Saint-Germain te an hmachhawn hunah fiahin an awm ang.

Ole Gunnar Solsjkaer-a'n United a enkawl tirh khan league match 17-ah point 26 an hmu a, an chunga awm Arsenal an phak lohna point riat a ni a, season thara Champions League khelh a beiseiawm loh.

Tunah erawh match 25-ah point 48 an hmu a, Arsenal aiin khelh zat inangah point khatin an hmu sang zawk. Solsjkaer-a hote hian Chelsea an phak lohna chu point hnih chiah a ni tawh a, season thara Europe inelna sang ber khel tur zinga rinkai an ni chho leh ta.

Manchester United manager lailawk Solsjkaer chuan, "Kan rilru put hmang a dik a, tun aia khel ṭha thei kan ni nachungin goal chhuah loa minute 90 chhung kan khel thei kha a lawmawm. Point thum hlawh chhuak tur khan an theihna zawng zawng an chhuah a ni," tiin a naute a fak a, hei hi a thlak tak Mourinho tih zen zen loh a ni.