Mizoram Police-in Quarterfinal lut

67th BN Mullick Memorial All India Police Football Championship-ah Mizoram Police chuan last 16-ah Manipur 2-1 a hnehin quarterfinal an lut a, nizan khan Punjab nen semifinal lut tur an zawng a, result kan hre hman lo.

Malappuram, Kerala-a inelna neihah hian Mizoram team an che ṭha a, knockout stage lut turin an group-a awm Madhya Pradesh, Gujarat, Rajasthan leh Assam Rifles te an sawp vek a, match li an khelh aṭangin goal 38 an khung a, goal khat chauh an chhuah.

Pathianni zan khan Manipur Police nen quarterfinal-ah an inhmachhawn a, Mizoram hian first half-ah F. Lalrinpuia penalty hmangin hma an hruai a, goal dang khung theihna tur hun ṭh a nei bawk mah se half time hmain goal dang a luh belh lo. Second half-ah Mizoram tan R. Lalthantluanga (Mama Ralte) in yard 30 aṭangin kawh zetin a pet goal a, 2-0 a ni.

Mizoram hian inkhel an thunun a, amaherawhchu Manipur hi hun tawp thlengin an tlawm duh lo a, minute li a la awm tihin freekick aṭangin an siphurh an sut ṭhen. Manager Francis Lalnuntluanga Ralte chuan, "Team boruak a ṭha a, kan inlungrual a, beiseina sang tak kan nei. Chutihrualin team dang hi anṭha hlawm khawp mai a, vanduai theihna vek a ni tawh ang," tiin Vanglaini a hrilh.

Mizoram Police hi manager Francis, assistant manager B. Lalneihsanga, coach Lalbiaksanga Colney leh assistant coach Zosangliana ten an ho a ni.