Tom Brady leh Bill Belichic hoin Super Bowl vawi 53-naah New England Patriots chak

Thawhṭanni zing khan Super Bowl vawi 53-na chu Mercedes-Benz Stadium, Atlanta-ah khelh a ni a, New England Patriots chuan Los Angeles Rams chu 13-3 in an hneh. Super Bowl awm tawh a score tlem ber ṭum a ni.

Kum 17 liam ta khan National Football League-a New England Patriots rorelna hi a inṭan a, coach Bill Belichic leh quarterback Tom Brady hoin tun ṭuma an hneh tho Rams chu 20-17 in an hneh. Hemi hnu hian Patriots hian vawi kua Super Bowl thleng leh tawhin vawi thum an chak lo.

Patriots quarterback Tom Brady chuan Super Bowl ring vawi ruk a lakna chiah a ni a, kum 66 mi Belichick tan pawh a vawi rukna a ni a, Super Bowl-a mahni team champion pui thei upa ber a ni bawk.

Team pahnihin an tlarhnung an tikhawng a, hemi avang hian an point hmuh belhkhawm hi point 16 chauh a ni a. Record dinglai kum 1973-a Miami-in Washington 14-7 a an hneh ṭum a, point belhkhawm 21 chu tun ṭuma mi hian a rawn khum chiah.

Super Bowl vawi 53-naah hian Patriots pace kicker Stephen Gostkowski chuan quarter khatnaah yard 46 aṭangin hlah mah se quarter hnihnaah 42 yard aṭangin field goal a nei  a, 3-0 a ni. Amaherawhchu, Rams place kicker Greg Zuerlein chuan yard 53 aṭangin field goal rawn nei ve lehin Super Bowl history-a field goal thui ber dawttu a ni.

Quarter tawp berah Patriots quarterback Brady chuan yard 34 hlaa awm Gronkowski chu hmu fuhin ani hian rookie Sony Michel touchdown turin a siam sak a, place kicker Gronkowski hian field goal nei zuiin 13-3 a ni chiah. Rams quarterback Jared Goff chuan hetiang chiah hi tum mah se Stephon Gilmore-a'n lo tla zepin New England Patriots-in hnehna an chang.

Patriots head coach Bill Belichick chuan, "Season ṭantirh aṭanga season laihawl thleng khan tumahin tun ang hun thleng tur hian min beisei lo. Amaherawhchu kan thlen chin kan thleng si," tiin a lawm thu ka sawi. Patriots quarterback Tom Brady pawhin, "Ka khelhpui zawng zawng te nen kan tan hun lawmawm a ni a, mumang ram a thleng dik a ni ber," tiin a lawm thu a sawi ve bawk.

Rams quarterback Jared Goff chuan, "A na takzet. Kan tlarhnung khan an tih tur hneh takin an ti a, Tom Brady kaihhruai team kan hmachhawn ṭumin an dang 

ṭha em em a. Keini lam khan kan tih tur kan ti ve lo a ni," tiin a sawi.