Minute thum bak mamawh lo Kagawa

Kum 29 mi Japanese midfielder Shinji Kagawa chuan Besiktas a pan hnua a match hmasa berah goal hnih a khung nghal a, heti zat goal khung tur hian minute thum bak hun a mamawh lo!

Japanese legend hian Borussia Dortmund-ah hmun pawimawh a chan phak loh avangin chhuah a dil a, German club tan hian tun season chhungin match li chiah a inlan. 

Turkey lam a pan hmain Hannover 96-in sawm mah se Germany chhuahsan a duh a, Besiktas hi season tawp thleng atan loan-in a zawm a, 6-2 a hnehna an channa inkhelah goal hnih a khung nghal ta a ni. 

Dortmund tan match 216 khelha goal 60 khunga assist vawi 55 neitu Kagawa hian a goal hmasa zawk hi a vawi khat ball khawihnaah yard 18 vel aṭangin a thlawh lut a, a hnu minute hnihah free kick hmangin a goal hnihna a khung leh bawk.