FA Cup Everton ngam loh Liverpool naupang!
FA Cup third round-ah Jurgen Klopp-a'n Everton en 'nau' tak chungin naupang rual a khelhtir a, Merseyside derby-ah 1-0 in Reds hi hnehna a chanpui.
Premier League hmahruaitu Klopp-a'n a ngaih pawimawh ber chu league nomawi a ni a, kum 30 an chawi tawh loh nomawi chawina dal tur thil awm a remti lo. Reds hian Premier League-ah Tottenham Hotspur leh Manchester United chu a zawnin an tum dawn a, Klopp chuan hei hi rilrua dah chungin a player ṭha rual a chawlhtir.
Mahse, naupang rual khelh zanah Everton-in an ṭhenawm club an ngam chuang lo a, minute 71-naa Curtis Jones goal 'cial' chu Reds chak nan a tling tawk.
Liverpool naupang
Jurgen Klopp-a'n league match hnuhnung bera Sheffield United hnehtu team aṭangin player pakua ngawt a thlak danglam a, player thar Takumi Minamino bakah Nathaniel Phillips leh substitute Yasser Larouci te chuan Liverpool tana an match hmasa ber an khel.
Naupang rual ho turin James Milner chu khelhtir ni mah se minute kuana lekah hliam vangin lakchhuah a ngai a, English player rinawm thlaktu chu Liverpool tana la inlan ngai lo Larouci a ni. Liverpool player langsar rual Sadio Mane, Mohamed Salah, Roberto Firmino leh Virgil van Dijk an awm miau loh avangin Everton-in Reds an zuam sawt a nih pawhin an thiam awm a, September 1999 hnua a vawi khat nan Anfield-ah chak an tum.
Mahse, Liverpool-in Alisson chawlh hahdam laia rintlak Adrian an nei a, Spanish goalkeeper hian Dominic Calvert-Lewin, Mason Holgate leh Richarlison-te hun ṭha neih a dansak a, man of the match chawimawina dawn phu khawpin a khel.
Jones - a dai tawh lo'ng!
Tlarhmaah Divock Origi chu Liverpool tana tawnhriat ngah player awmchhun a ni a, mahse Belgian striker ni loin kum 18 mi Jones leh kum 16 mi Harvey Elliott te chu player langsar an ni - an hmuhnawm takzet! Tlarhnung laia kum 22 mi Nathaniel Phillips lam hmaih a thiang lo a, VfB Stuttgart lama loan-a a khelh hnua an kohkir defender pawh hi a khel ṭha hle.
Tawnhriat nei ṭha Adam Lallana-a'n a tih tur dik tak tiin midfield-ah a rintlakzia a pholang a, naupang rual tan entawn tur a hnutchhiah - fak phu a ni. Minute 71-naah Jones a thiamna a lang chhuak a, Everton-in Anfield-a hnehna an chan hnuhnun ber kum hnih hnua piang ve chauh midfielder hian Everton keeper Jordan Pickford dan rual loha mawiin goal chung kil sirah a thlawh lut.
Klopp a hlim
Liverpool boss Jurgen Klopp chuan, "Tawnhriat nei tlem tak, hetiang ang game sanga a vawi khat nana khel an ni hlawm a, club ṭha tak, mipui tam tak hmaah an hmachhawn a ni a, chuti chung chuan inkhel hmuhnawm tak an pho chhuak.
"Second tin mai kha hmuhnawm ti takin ka thlir a ni. Liverpool player nih duh chuan he club kalphung hi an zah tur a ni. Engtiklai pawhin ṭha takin khelh reng theih a ni lo a, mahse theihtawp erawh kan chhuah reng tur a ni. He kan thupui hi kan zawm tlat reng chuan team hmachhawn chakawm kan ni ngai lo ang," a ti.
Everton manager Carlo Ancelotti chuan, "Liverpool starting XI khan kan khelh dan tur ruahmansa a ti buai lo a, second half-a kan tha kan thlah avanga chak lo zawk kan ni. Kan inrintawkna kan hloh a, a hnung lam aṭanga rang taka insiamṭhat turah kan ti thei lo ṭhin. "He team-in hma a sawn zel theih dan tur hi kan sawi ho leh ang a, hnathawk tur tam tak kan la nei tih hi ka pawm a ni," tiin a sawi.
FA Cup - Third Round
January 5, Pathianni
Middlesbrough 1 - 1 Tottenham Hotspur
BORO : Ashley Fletcher 50'
TOT : Lucas Moura 61'
Liverpool 1 - 0 Everton
LIV : Curtis Jones 71'
Gillingham 0 - 2 West Ham United
WHU : Pablo Zabaleta 74'; Pablo Formals 90+4'
Chelsea 2 - 0 Nottingham Forest
CHE : Callum Hudson-Odoi 6'; Ross Barkley 33'
Crystal Palace 0 - 1 Derby County
CRY : Chris Martin 32'
Queens Park Rangers 5 - 1 Swansea City
Charlton Athletic 0 - 1 West Brom
Bristol Rovers 2 - 2 Coventry City
Crewe Alexandra 1 - 3 Barnsley
Burton Albion 2 - 4 Northampton Town
Sheffield United 2 - 1 Fylde