CAB dodal nan all party meeting Ko turin CM leh Speaker an ngen

PRISM party chuan lian zawk leh nasa zawka Citizenship (Amendment) Bill, 2016 (CAB) dodal a nih theih nan all party meeting ko tura ngenna nimin khan Chief Minister leh Assembly Speaker hnenah an thehlut.

CAB chu Mizo ram, hnam leh sakhaw tan a him loh avangin lian zawk, nasa zawk leh inlungrual zawka dodal a ngai an tih thu sawiin PRISM chuan, "A bul ṭan nan political party zawng zawngte'n thukhat vuak a ṭul kan tih avangin all party meeting ko turin January 15, 2019 khan CM Pu Zoramthanga kan ngen tawh. Tun thlengin a hmalakna hmuh tur a la awm lo a, kan ngaih pawimawh si avang leh dan chhunga dodâl a ṭul kan tih avangin ngenna kan pen nawn leh a ni," an ti.

PRISM chuan, CAB chu Mizoram State Legislative Assembly-ah pawh dodal ṭul an tih avangin, Assembly speaker Lalrinliana Sailo hnenah pawh all party meeting ko tura ngenna an pe bawk tih an tarlang.