Italy-ah Jeje a inenkawl

Khup hliam zai vanga tun season-a la inlan lo Jeje Lalpekhlua chu Italy-ah a inenkawl mek a, India squad-ah koh a nih avangin March 9-a Blue Tigers zawm turin a lo kir ang. 

Chennaiyin striker hi tun season-ah Sandesh Jhingan nen hliam vanga an inkhel lo chungin coach Igor Stimac chuan squad-ah a ko a, hei hian mak tih a hlawh. Jeje chuan, "March 26-a inlan nghal tur chuan a harsa mai thei. Mahse, ka lo kir phawt ang a, engkim a chiang ang. Coach chuan squad zawm hrim hrim hi team boruak tihṭhat nan a ṭha a ti a, fitness test-te pawh kan kalpui phawt ang," tiin Vanglaini a hrilh. 

India hian March 26-ah Asian champion Qatar an mikhual dawn a, World Cup 2022 qualifier an khel ang. March 31-ah Tajikistan nen friendly match an khel leh dawn bawk a, a hmun tur tihchian a la ni lo. Jeje bakah hian NorthEast United midfielder Lalengmawia chu a vawi khat nan senior team-ah koh a ni a, Lallianzuala Chhangte leh Jerry Mawihmingthanga te koh an ni bawk.