Hammers hmaah Liverpool an zal Premier League nomawi inchuh a ngaihnawm

Thawhṭanni zan khan Liverpool chuan khualmualah West Ham 1-1 in an inhnehtawkpui a, Premier League nomawi inchuh boruak a nung sawt. 

Liverpool hian hnehna chang zo lo mahse table chung berah an la awm chhunzawm zel a, lawmna tur erawh a tlem hle - December 29-ah kha chuan Reds hian point kua ngawtin hma an hruai fal hman a, tunah erawh City aia an sanna chu point thum chauh a ni ta!

Manchester City hian zanin dar 1:15-ah Everton an lenchilh dawn a, hnehna an chang a nih chuan December 5 hnuah a vawi khat nan table chung ber an luah leh tawh dawn tihna a ni - Reds fans tan thu hriat nuam a ni lo. 

Liverpool-in match hnih chhung a zawna hnehna an chan zawh tak loh avangin City chauh niloin Tottenham Hotspur pawhin beiseina thar an nei ve leh ta a, Spurs hian Reds hi point nga chauhin an thlau tawh!

January atana PFA Premier League Player of the Month-a thlan Mohamed Salah-a'n a match hnuhnung pali-ah goal thum khung mah se match hnih chu a zawnin goal a khung ta lo.

 

Liverpool-in minute 22-na lekah Sadio Mane hmangin goal hmahruai an khung a, minute ruk hnuah Hammers hian Michail Antonio hmangin an si phurh an sut lehnghal - Anderson-a'n freekick hmangin lei hrulah ball a pet a, hei hi Antonio hian lo changin a pet lut. 

Reds tlarhmain ṭum dang an phak lo a, Hammers goalkeeper Lukasz Fabianski-a'n hna harsa thawh tur a nei lo, tia sawi theih hial a ni. Mahse, hei zawng aia ngaihven hlawh zui tur chu an tlarhnung a ni. 

Liverpool hi tun season-a an chet ṭhat chhanah an tlarhnung hming vawi tam lam rik a ni a, mahse Hammers lakah erawh vawi tam an nghing a, an hnathawh tur an thawk tawk lo.

Hammers si phurh sut danah Liverpool tlarhnung dem theih an ni a, a hnua Anderson leh Declan Rice te hun ṭha neih goal-a a chang lo kha an vannei takzet bawk. 

Liverpool-in goal hmahruai an khung khan James Milner chu a offside a, Reds manager Jurgen Klopp chuan Milner offside hi pawm thlapin an chak zawh loh phahah a ngai thung!

German coach chuan, "Kan goal kha a offside niin an sawi a, referee pawhin hei hi chu a hre ngei ang. Referee te hi mihring ve bawk an ni a, tihsual nei thei an ni. 

"Mahse, tihsual an nei tih an inhriat hian an talbuai ta ṭhin a, chumi avang chuan huaisen taka thutlukna siam turah pawh an huaisen tawk loh phah ṭhin a ni," a ti. 

West Ham manager Manuel Pellegrini chuan, "Klopp hi chuan offside hmanga hnehna chan hi a thiam riau a, Malaga ka enkawl lai khan Borussia Dortmund-in 3-2 in offside goal nen min hneh tawh," a ti a, a manager pui a dim lo. 

Liverpool hian hliam vangin  Joe Gomez leh Trent Alexander-Arnold an la chhawr thei lo a, inkhelh hmain Dejan Lovren, Jordan Henderson leh Georginio Wijnaldum an inhliam zui leh bawk.

Klopp chuan, "Inkhelh hma zanin training kan nei a, hliam vangin position thum chu kan thlak danglam a ngai a ni. Tunah hian chhuanlam ka siam lo a, thudik ka sawi mai chauh a ni. 

"Hliamin min tihbuai leh avang hian kan inbuatsaihna a ṭha tawk thei lo a, hetichung hian point kan hlawh chhuak leh tho a ni," a ti a, an duh ber point thum nei lo mah se lawmna tur neiah a inngai. 

Liverpool hian hun tawp hnaih lamah Divock Origi hmangin hun ṭha an nei a, mahse offside position-a awm nia lang Belgian striker hian pen ruk vel lek aṭangin Fabianski zawnah a pet.

Manchester City boss hlui Pellegrini-a'n a club hlui tan Liverpool hneh a tum thu a sawi lawk a, hneh zo ta chiah lo mah se a club hlui tan hna ṭha tak a thawk. 

Chilean manager chuan, "Kan inhmachhawn hma khan kan fan-te tan piah lamah City puih nan chak kan tum thu ka sawi a, hei hi Liverpool manager tan chuan thu hriat nuam lo tak a ni," tiin Klopp a bei zui. 

Manchester City hi tun season league-ah vawi li an tlawm tawh a, Liverpool boss hlui Roy Hodgson enkawl Crystal Palace leh Rafael Benitez enkawl Newcastle United chu an ngam loh an ni. 

Liverpool manager hlui ten an club hlui an pui a, tunah City boss hluiin a puih hun a thleng ve leh ta - Premier League a la ngaihnawm dawn chauh!