Everton ṭantuten Man City chak turin an duh

Premier League hma-hruaitu Liverpool hi an ṭhenawm club Everton ṭantuten champion turin an duh lo. Toffees hian zanin dar 1:15 hian Reds elpui Manchester City chu Goodison Park-ah an mikhual dawn a, Pep Guardiola hote hi an chak a nih chuan goal difference hmangin hmahruaitu an ni thei ang.

Everton erawh match 25-ah point 33 hmuin pakuanaah an awm a, an club sum sen tam ngaihtuaha an chet ṭhat loh avangin manager Marco Silva dinhmun a ṭha tawk lo.

Hetichung hian Everton ṭantu lam chuan an club dinhmun theihngilhin Liverpool champion lohna a nih phawt chuan Man City laka tlawm an hreh loh a, an ṭawngkam aṭang chuan châk zawk niin a lang hial.

Twitter-ah chuan 'Man City kan hneh chuan Silva ban tur' leh 'Marco Silva hian City hi a hneh a nih phawt chuan Blues ṭantute chuan an ngaidam lo ang' tih te chu an thu ziah dun dan a ni a, ṭhenkhatin 'Mihring te nuamsa taka kan awm zel theih nan Liverpool hian Premier League nomawi hi an hnaih tur a ni lo' tih te an ziak bawk a, Jurgen Klopp-a hote champion lo turin an duh.

Liverpool hian league nomawi an chawi hnuhnun ber chu 1989-90 season daih tawh kha a ni a, Premier League ṭan hma niin hetih lai chuan first division tih a ni a, Everton ṭantute hian hian hlawhtlinna an chang thei lo a nih pawhin an hmelma club Reds hi chu hlawhtling bik lo se an ti.

Everton hian nikum December thla khan Man City hi Eithad Stadium-ah 3-1 in an hneh lo a, an mikhual hnuhnun ber ṭum pawhin 3-1 thoin an chak lo. Amaherawhchu, January 2017 khan Toffees hian an mualah Man City hi 4-0 ngawtin an sawp a, August 2017-ah khualmualah 1-1 a an inhnehtawk bawk avangin Pep Guardiola hoten chetsual theihna hmun a nih zia an hrechiang ang.