Inkhelh tlem tum Nadal

Rafael Nadal chuan inelna zawng zawng hmachhawn duh mah se a taksa dinhmun ngaihtuahin tournament khelh tlem a pawimawh tawh thu a sawi a, clay court-ah erawh a tam thei ang a inkhel thung ang.

Grand Slam vawi 17 champion tawh Nadal hi January thla tir khan hliam vangin a inkhel thei lo, Australian Open inbuatsaih nana hman a tum Brisbane International aṭang pawhin a inhnukdawk - kuminah inelna pakhat bak a la hmachhawn lo a ni.

Spanish tlangval Nadal chuan, "Kum 32 mi ka ni tawh a, rawlthar thaza rual nen khaikhin theih ka ni tawh lo. Roger Federer pawh a kum tam hnuah chuan fing takin inelna a hmachhawn tur a thlang ṭhin, kei pawh hian a zawng zawnga inkhel tur chuan ka tlin tawh lo a ni," tiin a sawi.

Australian Open-ah set hloh loin Nadal hian final a lut thei a, mahse nomawi inchuhna inkhelah set la loin Novak Djokovic a ngam lo. Serbian tlangval nen hian tun season chu na takin an inel chho leh dawn tih a chiang nghal hle.

Nadal chuan, "Player ṭha an chhuak mek zel a, chutih rualin Novak hi number 1 a nih avangin a tawh a khirh hle tih ka hria. Clay court season kan hman turah erawh beiseina ka nei sang, season dang angin hlawhtlinna ka chan theih ngei pawh ka beisei," tiin a sawi.

Tun hnai season hnih chhungin Federer-a'n clay court tournament ho a khel lo a, Swiss star hian kuminah chuan French Open pawh khelh a tum - Nadal leh Djokovic te bakah Federer hi player naupang zawkte tana hmachhawn châkawm loh tak vek an la ni.