Santosh Trophy Qualifying Round Mizoram elpui tur Meghalaya

India rama state leh state football hmanga inelna sang ber chu National Football Championship for Santosh Trophy a ni a, NorthEast Zone Qualifying round chu Mizoramah nghah a ni dawn. 

Inelna hi February 11-16, 2019 chhung hian inelna hi neih a ni dawn a, Mizoram hi group A-ah Meghalaya leh Tripura nen an awm hoa.

Group B-ah Manipur, Assam, Arunachal Pradesh leh Nagaland te awmin group khat aṭangin team khatin final round an lut ang.

Mizoramin January 2014 khan a vawi khat nan Santosh Trophy Qualifying Round chu Lammualah a thleng a, match li an khelhah chak vekin goal chhuah loin goal 10 an khung a, final round an lut. Statistics thlir mai chuan Mizoram kalkawng hi a awlsam a, a tak takah chuan harsa takin final round an lut.

Mizoram hian Nagaland leh Arunachal Pradesh te 3-0 leh 5-0 in an hneh a, an elpui Manipur chuan team pahnih lakah hian goal 12 khungin goal khat an chhuah a, goal difference-ah an ṭha zawk. January 31-ah final round khel tur an zawng a, Lammual khatin mipui an pungkhawm a, football hmanga India ram awp châkin Mizo mipui an tuihal.

Inkhelh hmain tlangah mipui an ṭhu khat vek tawh a, bung tluk hma niin 'Lammual ti-Lammual-tu bung' hnuaiah an ṭhu ṭhup bawk. Bang-a banner intar zingah,  'We will give you, the worst 90 minutes ever', 'Kan duh ber chu champion, kan la awp dawn India', 'Kan sakruang Mizoram tan' tihte a tel nawk.

Tualchhung football history-a Lammual inkhel entu tam ber ṭuma sawi an awm a, ṭawmpuitu an tam ang. Manipur-in final round lut turin draw an mamawh a, inkhelh ṭantirh aṭangin keeper Lalit Thapa hoin hun khawhral mah se Mizo mipuiin Mizoram team an thlawp tlat avangin an ṭang zo lo. Minute 82-naah R. Laldanmawia'n goal hmahruai a khung a, injury time-ah Zico Zoremsanga'n a thun belh.

Mizo mipui ṭanrual rah a lang a, Mizoram team chu hemi kum hian a vawi khat nan Santosh Trophy-ah an champion.

Santosh Trophy nomawi dang hmuh tur  awm zui lo mah se, kum li chhungin semi final vawi thum an lut leh thei - kumin hian Mizoram hi an champion leh thei ang em?

Tun ṭumah erawh Mizoram leh Manipur te group khatah an awm tawh lo a, an elpui tur chu Meghalaya an ni ang.

 Kum 2014 khan Mizoram hian 5th Dr TAo Memorial Football Championship an thleng zui a, Mizo mipuiin an ngai hlu hle.

Harsatna nei loin Mizoramin final an thleng a, semifinal pakhat zawkah Manipur chu Meghalaya-in an hneh avangin mipui beisei ang final a thleng lo. Amaherawhchu India junior coach hlui Herring Shangpliang hoin Meghalaya-in Mizoram an barakhaih a, rinkai Mizoram a chak thei mai bik lo a, hun pangngaiah 1-1 in an inhnehtawk. Lammualah mipui an khat vek a, penalty hmangin chak zawk zawn a ngai. 

Penalty shootout-ah Mizoram an vannei a, 3-1 in hnehna an chang. Penalty hmanga chak zawk an zawn lai hian floodlight a thim a, he thil thleng avang hian a hmuna inkhel entu chuan tun thlengin an theihnghilh thei lo ang.

Santosh Trophy qualifying round bikah chuan kum 2015 khan Mizoram, Meghalaya leh Tripura te hi group khatah an awm tawh a, Assam rama inelna neihah hian Mizoram hi chak vekin final round an lut.

Kuminah hian Group A-a team pathum zingah Tripura hi team nem tura ngaih an ni a, tun ṭumah hian kum li hnuah Mizoram leh Meghalaya te hi an awm kawp a, anni pahnih hian final round luh an inchuh ang.

Santosh Trophy qualifier hi Lammuala khelh tura ruahman a ni a, Mizoram team lam pawhin ngawrh takin inbuatsaihna an kalpui mek a, final squad an la puang lo deuh a ni.