Vawiinah Hero Elite League semifinal

India naupang ṭhate inelna Hero Elite League semifinal chu vawiin hian Nagoa Panchayat Ground, Goa-ah semifinal khelh a ni dawn. Mizo club Aizawl FC Under 18 chuan tlai dar 3:00-ah FC Pune City an hmachhawn dawn a, inkhel dangah FC Goa leh Minerva Punjab te chawhma dar 9:00-ah an inkhel bawk ang.

Hero Elite League hi nikum September thla aṭanga khelh ṭan a ni tawh a, inlena hi qualifying round, playoff leh final round ah te ṭhenhran a ni. Aizawl FC hi final round-ah Mohun Bagan, Salgaocar leh Real Kashmir nen group khata an awm chungin quarterfinal an lut a, semifinal lut tur hian Chennaiyin FC chu 1-0 in an hneh.

Mizo club khingpui tur Pune City U18 hian Quess East Bengal U18 chu 2-1 in an hneh a, goal hnih hi Mizo rawlthar Laldawngkima khung niin Mizo rawlthar dang Lalrinliana Hnamte leh F. Malsawmtluanga te an khel bawk. 

Aizawl FC Under 18 manager H. Lalnunzira chuan, "Kan player pawimawh Ayush Chhetri hi damlohna vangin damdawi inah hruai a ngai a, a khelh theih tho erawh kan beisei. Player dang zawng an dam ṭha a, hnehna chan ngei kan tum ang. Mizo ṭhahnem tak kan tan an ṭawngṭai ṭhin tih kan hria a, kan lawm takzet a, kan tana ṭawngṭai zel turin kan ngen a ni," tiin Vanglaini a hrilh.