Formula 1 Season tharah eng thil nge kan hmuh dawn?

Car intlansiakna sang leh ngaihhlut ber Formula 1 chu March 17 aṭangin Melbourne Grand Prix Circuit, Melbourne-ah tlan ṭan a ni dawn a, team inlan tur an inpeih thawkhat tawh hle.

February 13-14 hian team tam zawk chuan an car hman tur phochhuahna an nei dawn a, February 18 aṭang hian team tinin Barcelona-ah inbuatsaihna leh enchhinna chu official takin an kalpui dawn.

Team champion lai Mer­cedes chu chungnung leh ber tura ngaih an ni a, beisei phak lo Ferrari an insiamṭha thei ang em tih leh, Red Bull leh Mc Laren ten engtianga hmasawnna nge an rawn chhawp chhuah dawn tih chu car intlansiak ngainatute hmuh chak a ni.

Season hmasa khan Merce­des hian a zawna a vawi nga nan driver leh constructor cham­pionship-ah nomawi an chawi kawp a, inelna bika record nei ṭha ber Ferrari leh Michael Schumacher ten an vanglaia an sulhnu hnutchhiah nih rual turin tun season-a an champion kawp leh chuan a tawk.

Mercedes hian a nihna takah chuan tun hnai season hnih chhung chu Ferrari aiin car an nei chak bik chuang lo, mahse season chawhnu lama team che fuh zawk an nih ṭhin avangin champion thei an ni - tihsual neih tlem a pawimawh leh dawn.

An driver duhlai Lewis Ha­mi­lton-a'n a vawi ruk nan champion a tum dawn, Britain tlangval hi inrintawkna sang tak nena inlan tur a nih avangin midang tan elpui hautak a ni ang. Mercedes car khalhtu pakhat zawk Valtteri Bottas erawh a nihna takah chuan duhsak hlawh loh zawk a ni a, season hmasa khan pakhatna nih a nei lo - a hma hun beisei awm taka siam tur chuan season khat daih contract a neih lai hi ṭha taka a hman a pawimawh ang.

Ferrari hian danglamna an nei dawn, team principal Mauri­zio Arrivabene chu technical boss ni ṭhin Mattia Binotto-a'n a thlak a, driver Kimi Raikkonen aiah Charles Leclerc a awm tawh dawn bawk.

World champion vawi li ni tawh Vettel chu an hmachhuan ber tur a ni leh dawn, German tlangval hian Grand Prix vawi 52-ah hnehna a chang tawh a, 2014-a Red Bull a chhuahsan hnuah erawh world champion a la ni leh lo - team ṭha zawka ngaih Ferrari tana a champion lo leh a nih chuan inenfiah a mamawh ang.

Season hmasa pawh khan Mercedes aiin an car a chak zawk ngei niin a lang, mahse season chawhnu lamah an talbuai. Technical director ni tawh ṭhin Mattia Binotto-a'n technical bikah engtiangin nge hma a lak chhoh dawn tih chu hriat chakawm tak a ni; chu aia pawimawh pakhat chu team boruak nuam leh ṭha tak a siam thei ang em tih chu zawhna lian tak a ni bawk.

Mercedes leh Ferrari te ang­in an hming a langsar tawk lo a ni mai thei. Amaherawhchu, Red Bull hian tun hnaia driver chhuak thar beisei awm bera ngaih Max Verstappen an kawl a, 2010-13 bawra F1 roreltu an nihna ang kha an nei let leh a nih pawhin a mak lo ang.

Tawnhriat ngah zawk Daniel Ricciardo a awm tawh dawn loh avangin Verstappen-a teammate thar tur French tlangval Pierre Gasly hian engtiang takin nge theihna a neih san tih hriat a la ni lo, kum 21 mi chauh ni chungin Verstappen chungah mawhphurhna a sang dawn hle.

Red Bull hian season thar aṭangin Honda engine an hmang dawn a, an engine thar hian Mercedes leh Ferrari te a elphak tura ngaih a ni - a pawimawh ber erawh ngelnghet taka season hman tluan theih a ni ang. 

Red Bull driver hlui Daniel Ricciardo-a'n a zawm avangin Renault hian beiseina an neih san phah, Australian driver hi Grand Prix vawi sariha hnehna chang tawh a nih avangin team ṭha dang kara hnehna chan theih an inbeisei hi a mak lo.

Renault hian 2016 aṭang khan F1 team hi an an nei thar leh a, kha tih hunlaia an thil tum chu season nga chhunga champion thei tur team din a ni. Nikum khan beisei an phak chiah lo a, 2021-a champion an duh a nih chuan nasa taka hma an sawn a ngai.

Hass chuan a zawna a season thum nan an driver Romain Grosjean leh Kevin Magnussen te an inkawp tir dawn a, 2017 ai chuan nikum khan nasa takin hma an sawn tih a hriat - kuminah chuan team leh driver in tihsual an ngah lutuk ṭhin kha an tih nep deuh a ngai ang.

McLaren-in vawi hnih champion tawh Fernando Alonso an nei tawh dawn lo, Spanish driver aiah hian Carlos Sainz a awm dawn a, ani hi Lando Norris nen teammate an ni dawn a, duhsak tur zawk awm lo khawpa intiat leh inel tawk tura ngaih an ni.

Williams car khalh ṭhin Lance Stroll-a'n a pa team Racing Point tan inelna a hmachhawn dawn. Canadian billionaire Lawrence Stroll chuan a fapa chungah beiseina a nei sang a, car inelna sang bera mahni team tana a tlan tur hian ngaihven a hlawh.

Tawnhriat ngah kum 40 mi Kimi Raikkonen-a'n Alfa Romeo Racing car a khalh dawn a, F1 career bulṭanna a nih avangin a hlu danglam dawn - Antonio Giovinazzi nen an inkawp dawn a, champion beisei phak lo mah se driver dang nek buai thei tur an ni dawn.

Red Bull duh loh hnu Daniil Kvyat chuan a vawi hnih nan F1 inelna a hmachawn dawn, Russian driver hian Toro Rosso car a khalh ang. Kvyat hi a tlan chak thei hle a, mahse a chetfuh leh chetchhiat kar a inthlauh em avangin beisei san ngam a har.

Kum 2011 khan Robert Kubica a chesual a, season riat ngawt hnuah Polish driver hi a rawn kir a, beiseina nen Wil­liams car a khalh dawn. Season hmasa khan Williams hi team championship-ah a hniam ber an ni a, car tih ṭhat hmasak chu an hna pawimawh hmasa a ni ang.