Kan boruak a khirh - Goretzka

Bayern Munich midfielder Leon Goretzka chuan Bundesliga lama result an neih ṭhat loh chuan an chungah pressure a siam thu a sawi a, zanin dar 1:15-a Hertha Berlin nen German Cup an khelh turah hnehna chan an mamawh thu a sawi bawk.

German champion hi kar tawp khan Bayer Leverkusen lakah 3-1 ngawtin an tlawm a, hmahruaitu Borussia Dortmund an phak lohna a zau zel. Bavarians tan zanin hi insiamṭhatna tur hun ṭha a ni.

Tun hnai match thum aṭanga goal li khung thei Goretzka chuan, "Boruak sang tawn hi ka chak a, hei hi Bayern Munich ka zawm chhan pawh a ni. Team ṭha kan nih avangin chak loh hnuah thawhleh nghal zel kan duh, Berlin lakah pawh chak kan tum," tiin a sawi.

Senior player Arjen Robben leh Franck Ribéry ten kar hmasa khan training an zawm tawh a, league match bikah chhawr la ni lo mah se a ṭul a nih chuan zaninah an inlan theih beisei a ni.

Goretzka chuan, "Anni pahnih hi kan tan an ṭangkai em em, an tawnhriat bakah khelmual chhunga min uapna hi a hlu. Tun hnaiah match kan ngah chhoh dawn avangin an rawn kir theih hun hi a fuh hle," a ti.