Copa del Rey semifinal-ah El Clasico

Spanish football-a inelna ngaih-hlut hlawh ber pawl Copa del Rey semifinal chu zanin dar 1:30-ah khelh a ni dawn a, khawvel ngaihven 'El Clasico' hmangin final lut tur zawn a ni dawn. 

Barcelona khelmualah Real Madrid an lenglut hmasa zet dawn a, second leg hi February 27-ah khelh leh tur chauh a ni ang - fixture a hautak chhoh dawn avangin zanin inkhela chak nih hi a pawimawh dawn a, a bik takin mahni muala khel tur Barca tan a pawimawh lehzual ang. 

Tun hma chuan El Clasico hi Lionel Messi leh Cristiano Ronaldo indona a ni tel nghal ṭhin a, mahse tunah erawh Ronaldo a awm tawh lo - hman aṭanga club pahnih lo inhal tawhna thlir erawh chuan boruak a nep phah dawn lo. 

Ronaldo leh Zinedine Zidane te chhuah hnuah Real-in tlakchhiat lam an pan a, Barca erawh an vul zel thung - Real fan-te tan Barca hneh ringawt pawh hi nomawi 'tluk' deuhthaw a ni. 

Barca fan-ten El Clasico hmaa an thu hriat chak loh ber an hria a, chu chu an thiampuipa Lionel Messi a inlan thei lo mai thei tih hi a ni. Messi hi Valencia nen 2-2 a an inhnehtawk ṭumin a inhliam.

He thu buatsaih a nih lai hian a ṭhiante training a la zawm ve lo a, a inhliam tirihin coach Ernesto Valverde-a'n hlauhthawnawm a nih loh thu sawi mah se a inlan theih a beiseiawm ta lo zawk. 

Hetihlai hian Ousmane Dembele dinhmun a chiang lo bawk. French forward hi January 21 khan Leganes lakah a inhliam a, Thawhṭanni khan club training zawm leh tawh mah se mimalin training hi neih tir a ni. 

Messi leh Dembele hi an awm lo kawp a nih ngat chuan Barca tan a harsa dawn tih a chiang a, Real erawh ṭum dang zawng aiin an phur sawt ang. 

Barcelona boss Ernesto Valverde-a'n Messi leh Dembele a hmang thei dawn lo a nih chuan an khelh dan phung a thlak danglam a ngai dawn tihna a ni a, hei tak hian Spanish manager lu hi a ti hai khawp ang. 

Messi leh Dembele hi an in 'fit' hman lo a nih chuan Valverde hian a formation hman ṭhan 4-3-3 ai chuan 4-4-2 a hman a rinawm a, midfield thuam chak hmangin Real hi nawr a tum ang.

Midfield-ah hian Sergio Busquets leh Ivan Rakitic chu inkhel bul ṭan tura beisei an ni dawn a, Arthur, Arturo Vidal, Philippe Coutinho leh Carles Alena te chu bul ṭan thei dang an ni bawk. 

Tlarhmaah Luis Suarez leh  Kevin-Prince Boateng an inkawp a rinawm a, Real tlarhnung meuh su hawng tura Suarez kawppui tur chuan Boateng hian sit tu a ngah khawp ang!

Barcelona tan goalkeeper Jasper Cillessen chu hliam vangin a inlan thei dawn lo a, a hmun ruakah hian Marc-Andre ter Stegen chuan si ban a nghak ang. 

January 2017 hnuah German keeper hian Copa del Rey a khel leh dawn tihna a ni - Champions League leh La Liga lamah first choice ni mah se Copa del Rey bik hi chu Cillessen hian goal a veng ṭhin a ni. 

Barcelona nena inhmeh lo tak chu an tlarhnung pawp thu sawi hi a ni a, mahse thudik a ni miau si - he team hian Nou Camp-ah an goal an venghim hleithei ṭhin lo a, tun season-a an khelmuala match 12 an khelh tawhah goal 15 an chhuah tawh!

Barcelona hian 2002/2003 season khan an home fixture-a match hmasa 12-ah goal 16 an chhuah a, tun hi hemi hnua annmahni khelmual ngeia hetih hunlai vela goal an chhuah nasat ber a ni. 

Catalan club-in an khelmualah goal an chhuah nasat thu kan sawi rual chiaha an tana hriat nuam lo tur chu Karim Benzema 'form' lai tak a ni, tih hi a ni - Benzema hian tun season-ah goal 18 a khung tawh. 

French striker hian Real tana a match hnuhnung pali-ah goal ruk a khung tawh a, Barcelona lakah a chet ṭhat chhawm nun a tum ang.