Zaninah MFA Futsal League 2019

RFL Plastics MFA Futsal League chu zanin hian Electric Veng Indoor Stadium-ah group A team pariat ten an khel dawn. Round hmasa berah draw result a awm lo a, match li lek aṭangin goal 48 ngawt a luh avangin zaninah pawh goal a lut tam ang.

Point thum hmu tawh Laipuitlang club Laipui FC chuan tlai dar 5:00-ah point la nei lo Bungkawn FC an hmachhawn dawn a, Laipui FC tan Lalnunzama chuan match hmasa berah goal li a khung a, Bawngkawn tan Lalremruata chuan hetiang zat bawk hi a khung, mimal an pawi-mawh a, chutihrualin team thawhhona ṭha a la pawimawh zawk.

Zan dar 6:15-ah point la hmu lo pahnih Armed Veng South leh Ramhlun Venglai te an inkhel dawn a, tun ṭumah hian point hmu lo an awm a nih chuan quarterfinal kalkawng a sak ṭalh ang.

Dinthar club Lawmna FC-in zan dar 7:30-ah Saron Veng FC te an inkhel dawn. Saron Veng hi match hmasa berah goal khat chiahin an chak lo a, Lawmna FC erawh George MS Dawngliana goal ruk hmangin an chak. George hi futsal inelnaa goal khung thei ber zinga mi a ni a, ven uluk a ṭul ang.

Chanmari Zothan Futsal-in an match hmasa berah hnehna an chang hram a, anmahni ang bawka point thum hmu tawh Ramhlun South nen zan dar 8:45-ah an inkhel dawn. Futsal lamah pawh Rochhingpuia chu Chanmari khai pa a ni tho a, Chanmari FC U17 pawh champion pui tawhtu Lalhmachhuana chu an veng club Ramhlun South lamah player pawimawh a ni.