Punjab lakah Mizoram vanduai

67th BN Mullick Memorial All India Police Football Championship-ah Mizoram Police beiseina chu Thawhṭanni zan khan Punjab lakah a thamral.

Malappuram, Kerala-a inelna neihah hian Mizoram leh Punjab hi hun pangngaiah goal awm loin an inhnehtawk a, extra time-ah Punjab striker chuan chakna goal a tauh lut.

Mizoram hian group stage-ah harsatna an tawk lo a, Madhya Pradesh, Gujarat, Rajasthan leh Assam Rifles te an sawp vek a, match li an khelh aṭangin goal 38 an khung a, goal khat chauh an chhuah. Last 16-ah Manipur hmachhawnin Mizoram hian 2-1 in an hneh a, inkhel an thunun tel bawk.

Quarterfinal-a Punjab nen an inkhelh ṭum hian Mizoramin inkhel an thunun thei bik lo a, chance erawh an ngah hret a, chak phu bik awm lohna inkhelah a vanduai zawkah an ṭang.

Mizoram Police hian All India Police Football Championship-ah hian nomawi an la chawi ngai lo a, he inelna hi Police tan chauha buatsaih ni mah se knockout stage chinah chuan football hmanga state leh state inelna lian ber Santosh Trophy ang thoin tawh a khirh.

Mizoram Police hian nikum khan recruitment ti tharin player ṭha tak an kawl a, amaherawhchu Police training vangin football lamah training an nei hman lo. Police training an zo tawh a, kum tharah chuan team ṭha zawk an din thei ang. 

Tun ṭumah hian manager Francis, assistant manager B. Lalneihsanga, coach Lalbiaksanga Colney leh assistant coach Zosangliana ten Mizoram Police team hi an ho a ni.