Liverpool aiin United-in squad nei ṭha zawk - Carragher

Liverpool legend Jamie Carragher chuan Premier League hmahruaitu chu Manchester United aiin squad an nei chhah lo zawkah a ngai a, chutihrualin starting eleven bikah erawh a club hlui chu an ṭha zawkah a ngai.

Liverpool tana a vanglai hun zawng zawng hmangtu Jamie Carragher chuan, "Ka ngaihdan dik takah chuan Manchester City dawtah chuan Manchester United hian squad an nei ṭha berah ka ngai. Hei hi kan ṭanna sa a ni a, tlarhnung bikah erawh chuan a ṭha ber zinga mi an nih loh pawhin thlan tur an ngah a ni," tiin United-in squad an neih ṭhat thu a sawi.

Amaherawhchu, Carragher ngaihdan hi Liverpool legend Graeme Souness erawhin a ṭawmpui lo. Hemi chungchang hi Carragher chuan, "An squad hi thlir ula, bench-ah Martial te an dah thei a ni. Liverpool attacking en ula, Martial emaw Alexis Sanchez, Rahsford emaw Lukaku te anga theihna nei sang bench-ah an dah thei lo a ni," tiin a ngaihdan a sawifiah.

An player neih dan khaikhin zuiin Carragher chuan, "Liverpool hian starting eleven chu an nei ṭha zawk ang. Mahse bench aṭanga lut ṭhin Daniel Sturridge leh Divock Origi te hi chuan United neih hi an tluk lo. Manchester United hian an theihna tak an pho chhuak lawk lo a, tunah chuan an lantir ṭan ta. Solskjaer hnuaiah kan United squad aṭanga kan beisei  chu kan hmu ṭan," tiin starting eleven bikah chuan a khelhna club a dah sang zawk.

Manchester United leh Liverpool te hi club inhal tak a ni a, Jose Mourinho-a'n beisei aia hmaa a hna a chan chhan nia lang chu Jurgen Klopp-a hote laka 3-1 zeta an chak loh vang a tih theih a. Anfield-a inkhelah hian United hi dawl zawrin an zawr a, kawng tinrenga an hmelma an phak loh avangin Portuguese manager-in a hna a chan hi a mak lo.

United manager tur an inrinsiak a, manager nghet la loin Ole Gunnar Solskjaer chu team enkawl tura lak a ni a, Norwegian manager pui turin Sir Alex Ferguson assistant hlui Mike Phelan an lalut tel a, Old Trafford-a thuneitute tharte chu club chhung hrechiang tho an ni.

Club chhung boruak ṭha lo chu siam ṭhatin a awm a, Solskjaer hnuaiah United hian point 24 hmuh theihah point 22 an hmu a, hemi hun chhung bikah hi chuan Premier League club che ṭha ber an ni a. United player manto ber Paul Pogba chu Mourinho hun hnuhnung lamah bench-ah dah mah se Solskjaer hian youth team-a a enkawl tawh player hi tilungawiin team khaipa a ni zui a, Marcus Rashford leh player dang pawhin hma an sawn vek bawk.

United-in January transfer-ah player an lalut lo a, Mourinho hman thiam Marouane Fellaini erawh a chhuak thung. Belgian midfielder hi Mourinho hnuaiah pawimawh mah se United thutlukna hi supporter-ten an sawisel lo.

Manchester United assistant manager hlui Steve McClaren chuan, "Mi tam takin manager atan Solskjaer an la hi mak an ti a, kei chuan Ole hi ka hrechiang. Hmalam hun uluk taka thlir chi a ni a, a fingin rem a hria a, player biak kawngah a ṭha bawk. Mi ṭhahnem takin he hna a chelh hian chan tur a neih loh avangin pressure a nei lo te an ti a, a dik lo hul hual. Khawvel club lian pathum zinga mi a enkawl a, pressure nasa tak a awm.

"Tih ṭhat a duh avangin amah leh amahah pawh pressure a nei ang. Mahse hetiang zawng zawngah hian mi beisei a khum vek. Result chauh ni loin an khelh danah pawh tun hmaa United khelh dan angin attacking football an khel a. An chak chhoh zel theih phei chuan United thuneitute tan pawh manager ngheta dah a harsa lo ang," tiin a player hlui a fak hle.

United hian Mourinho hnuaia league match 17 an khelhah point 26 an hmu a, an chunga awm Arsenal an phak lohna point riat a ni a. Tunah erawh United hi match 25 khel tawhin point 48 an hmu a, Arsenal aiin khelh zat inangah point khatin an hmu sang zawk. Solsjkaer-a hote hian palinaa awm Chelsea an phak lohna chu point hnih chiah a ni tawh a, Norwegian manager enkawlna hnuaiah United hma an sawn a, eng nge an thlen dawn tih erawh hunin a hril ang.