Futsal World Cup Team 13 an tling tawh

2020 FIFA Futsal World Cup chu September 12  leh October 4 chhung hian Lithuania-ah khelh a ni dawn a, inelna hmachhawn tur ram 13 a hriat tawh. Inelna thlengtu Lithuania chu tling sa an ni a, Europe-in ram ruk dang an la thawh tho ang. 

Inelnaah hian khawmualpui paruk aṭangin ram 24 an tel dawn a, Europe aṭangin vawi hnih champion tawh Spain, Russia, Portugal leh Kazakhstan te an tling tawh. Hmun ruak dang pahnih ram paliin April 9 leh April 12 hian an zawng dawn. Croatia leh Czech Republic ten hmunruak pakhat an zawng ang a, Serbia leh Finland te inkhela chak zawk an tling bawk ang. 

Oceania aṭangin Solomon Islands an tling tawh a, ram ṭha awm khawmna South America aṭangin ram pali Argentina, Brazil, Paraguay leh Venzuela te an tling tawh. Argentina hi champion lai an ni a, Brazil hian 1989, 1992, 1996, 2008 leh 2012 te khan nomawi an chawi. 

Africa aṭangin ram pathum Angola, Egypt leh Morocco te an tling tawh bawk. Asia-in quota panga an nei a, February 3 khan Turkmenistan-ah khelh ṭan tura ruahman ni tawh mah se coronavirus vangin an la khel thei lo. CONCACAF-in (Central, North America leh Caribbean) team pali an thawh thei a, tunah hian qualifying round khel mekin May 8 hian inelna hmachhawn tur a hriat kim ang.