Staples Center-ah Bryant thlahna hun hmang

Thawhṭanni zan khan basketball legend Kobe Bryant thlahna hun Staples Center-ah an hmang a, a hun hming atana 'celebration of life' tih an vuahah hian milar, basketball player leh Kobe-a fan ṭhahnem tak an pungkhawm.

Los Angeles Lakers shooting guard hlui Bryant hi kumin January 26, Pathianni zan khan helicopter chesual avangin a thi. Chetsualnaah hian Bryant-a fanu Gianna (Gigi) leh midang pasarih telin nunna an chan vek. Byrant hian a nupui Vanessa bakah a fanu dang pathum Natalia, Bianca leh Capri te a kalsan a ni.

Zaithiam lar Beyonce chuan Kobe-a hla duh XO hmangin bul a ṭan a, American singer chuan, "Kobe ka ngainat avangin helai hmunah hian ka lo tel a, XO hi a hla duh ber zinga mi a ni," tiin a sawi a, 'Halo' tih hla a sa tel bawk.

Kobe Bryant-a nupui Vanessa chuan, "Kobe kha fanu tana pa nih tling a ni a, hemi kawngah hian MVP a ni a. MVD 'Most Valuable Dad' pawh kan ti thei ang," tiin a pasal a fak.

NBA champion vawi nga ni tawh Bryant chungchang sawi zuiin Vanessa chuan, "Pasal ṭha tak a ni a, min hmangaih dan hi thuin ka sawifiah zo lo. Min kalsan takah chuan kan faten nupui an neih hunah biak inah a hruai lut thei dawn lo a, lamtualah min lampui thei dawn lo. 

"Amaherawhchu, ka fanute hian an pa hi mi fel tak, pasal leh pa ṭha tak a ni tih hria se ka duh a. Mahni tihsual aṭanga insiamṭha zel ṭhin a ni a, midangte tana entawn tlak a nun tum a ni," tiin a pasal chanchin a sawi.

A fanu Gigi chungchang sawiin Vanessa chuan, "Naupang fel leh rilru ṭha a ni a, WNBA player ṭha ber ni tura theihna nei a ni. Pasal a nei dawn ta lo a, fa a nei dawn ta lo. A nungchang en khan nu nih tling tak a ni ngei ang," tiin a sawi a, chung lam en paha Bryant hming lamin uluk taka Gigi enkawl turin a hrilh.

Bryant thlahnaah hian basektball legend Michael Jordan, Magic Johnson, Shaquille O'Neal, Jerry West leh Kareem Abdul-Jabbar bakah tun laia lar Stephen Curry, James Harden leh Russell Westbrook te an tel a. Milar zingah pawh Jennifer Lopez, Kim Kardashian West leh Kanye West te hmuh tur an awm.

Chicago Bulls legend Michael Jordan chuan, "Kobe Bryant a thih khan ka nunna thil pawimawh tak pakhat chu lak boin a awm. Mi tam tak chuan kan khelh dan an khai khin ṭhin a, kei chuan a chanchin chauh sawi ka duh. Unaupa, hahdam takin chawl ang che," tiin mittui tla chungin a sawi.

LA Lakers-a Bryant-a kawppui Shaquille O'Neal chuan, "Kobe nen khan basketball game ropui ber zinga mi inkhel pholang turin kan thawkrim a. Kan pahnih hian kan inzah tawn em em bawk. Mamba, a hun hmain kan zing aṭangin min kalsan a. I hnung kan dawl zel ang," tiin a sawi. Bryant leh O'Neal te hi Lakers-ah kum riat khel dunin season thum chhung a zawnin NBA champion an ni dun a ni.

WNBA player ropui Diana Taurasi, American college star Sabrina Ionescu leh Bryant-a agent hlui leh Lakers general manager nilai Rob Pelinka ten Bryant-a chanchin an sawi a. Alicia Keys leh Christina Aguilera ten zai hmanga mipui an awi zui a, minute nga film 'Dear Basketball' an en ho. 

Bryant-a'n kum 2015-a basketball a chawlhsan khan Dear Basketball tih a ziak a, hemi behchhaha film tawi siam hian 2018 Oscar khan best short animated film a la hial.

Bryant-a thlahna hun hi Nat King Cole-a hla 'Unforgettable' hmangin tihtawp a ni a, mipuiin 'Kobe, Kobe' tiin an chhawn.