Tennis season a hmuhnawm leh dawn

Roger Federer, Rafael Nadal leh Novak Djokovic te mimal chanchin chauh pawh hi ngaihnawm tham a tling a, player ropui rualin an vanglai an hmang rual hi tennis chanchin ti ngaihnawm zualtu a ni chiang hle.

'Big Four' zinga mi Andy Murray-a'n hliam vangin beisei a phak ta lo thung. Britain tlangval hi season hmasa ai chuan kuminah a inkhelh tam zawk theih beisei a ni. Player ropui tak tak te hi an la ropui chhunzawm dawn nge player naupang zawk ten an nek chhuak ve tawh dawn tih chu hriat chakawm tak a ni.

Player ropui ber tu nge tih zawhna hi a chhangtu a zirin an chhanna a inang lo nasa hle ang. Grand Slam nomawi neih hnem lamah erawh vawi 20 champion tawh Roger Federer chu a chungnung ber a ni, a hnuaiah hian amah aia vawi khata champion tlem zawk Nadal a awm.

Swiss legend Federer hi kum 38 mi a ni tawh, major tournament-a a champion hnuhnung ber chu 2017 Australian Open daih tawh kha a ni. Kumin January 20 aṭanga khelh tur Aus Open-ah pawh a record ti chhah zual turin beisei a nei sang leh ang.

Mi inngaitlawm Nadal-a'n, 'Federer hi a ṭha ber, ani nena khaikhin chi pawh ka ni lo' tiin sawi fo tawh mah se a sulhnu en chuan Spanish tlangval hi a nep bik lo. Season hmasa khan French Open leh US Open-ah a champion thei, kuminah nomawi lian dang a chawi leh ngei a rinawm.

Federer leh Nadal te sulhnu neih sa chauh pawh hi a ropui tawh a, nakin zelah an inkhel lai en hman lo ten an tehna tur pakhat chu nomawi an chawi hnem lamah a ni dawn. Ṭhangthar ten an chanchin an keu let huna ropui zawka an ngaih theih nan a tam thei ang ber title lak an tum dawn - a la hmuhnawm dawn chauh.

Grand Slam vawi thum champion thei Stan Wawrinka, US Open champion hlui Marin Cilic leh Juan Martin del Potro te hi theihna nei sang an ni a, chutihrualin an vanglai hi Nadal leh Federer te vanglai nen a inrual miau avangin an thleng sang tawk loah a ngaih theih.

Anni hi an kum a tam deuh tawh a, player ṭha tak ni mah se ropui taka an inlan thut a rinawm tawh lo. World number 2 ni chunga season khar Novak Djokovic erawh Federer leh Nadal te nomawi chawi hnem record khum vek thei tur khawpa theihna nei a ni tih a chiang.

Serbian tlangval hian season hmasa khan Australian Open leh Wimbledon title a la, tennis a khelh hun chhungin Grand Slam nomawi 16 zet a la tawh; a khelh fuh season a nih chuan pahnih aia tam pawh la leh thei turin a la fit ṭha tawk.

Djokovic hi kum 32 mi a ni tawh a, a vanglai tak chu a pel tawh. Amaherawhchu, a rilru a paukhauh a, hliam nei loa a inkhel thei a nih chuan beisei a nei sang thei ang. Mahse, dar (shoulder) leh hnungzâng na vanga buai ve fo tawh a ni tih erawh hriat tel a fuh ang.

Austrian tlangval, kum 26 mi Dominic Thiem hi rawlthar tih ai chuan tlangval tih tur a ni tawh zawk ang. Ani hi clay court hmang thiam a ni a, tun hnai season hnih chhung chu French Open final a lut thei. Mahse, clay a nih miau avangin Thiem chanchin pawh 'mahse' hmanga ziah zawm a ngai leh ṭhin.

Paris khawpuia final a luh pahnihah hian Rafael Nadal a ngam lo ve ve, kuminah hian tawnhriat a ngah zual tawh a, a taksa lam pawh a chak vanglai tawng chho tur a nih avangin player uaithla lam tawh Nadal hnehin clay lal thar piantir a tum ngei ang.

German tlangval Alexander Zverev hi a pian hmang leh theihna enin thleng sang tura ngaih a ni. Amaherawhchu inelna lianah Zverev hi a thleng sang ngai lo, ani hi kum 22 mi chiah a la ni; a ṭha zual pariat inelna ATP Finals champion thei a ni tih erawh theihnghilh loh a ṭha ang.

Stefanos Tsitsipas hi rawlthar beiseiawm berte zinga mi a ni mek, Next Gen Finals champion thei a nih bakah season hmasa khan Australian Open-ah Roger Federer a hneh thei. Thahrui a ngah a, Greek huaisenna nei a ni bawk; teirei peihna leh dawhtheihna a la mamawh.

Daniil Medvedev hming inzawh nawn a ngai lo, Russian tlangvalin season hmasa tawp lam a hman ang khan a khel leh a nih ngat chuan US Open finalist hi player hnuhnawm leh huphurhawm ber zingah a tel dawn. New York khawpui khuan tennis a thiamzia chu an 

hrechiang tawh.