Osaka-i'n Serena beiseina titawp
Serena Williams-i'n Grand Slam lak tam lama Margaret Court record vawi 24 nih rual turin vawi khat champion la mamawh mah se nimin khan Naomi Osaka lakah a beiseina a tawp. Rod Laver Arena-a hmeichhe Australian Open semifinal inkhelah Osaka a ding chang a, 6-3, 6-4 in a idol Serena a hneh.
Kum 23 mi Osaka hian final-ah Karolina Muchova hnehtu Jennifer Brady a hmachhawn dawn a, hmeichhe nomawi inchuhna hi Rod Laver Arena-ah February 20, Inrinni tlai dar 2:00-ah khelh a ni ang. Osaka hian Grand Slam final vawi thum a khelh tawhah hnehna a la chang vek. A khingpui tur Brady tan erawh tun ṭum hi a vawi khat Grand Slam final khelhna tur a ni a, nikuma Australian Open semifinal a thlen kha tun hmaa a thlen san ber ṭum a ni.
Serena a ngaisang
Naomi Osaka hian hnehna chang turin minute 75 a hmang a, set khatna la turin minute 38 a mamawh a, set hnihnaah minute 37 a hmang. Japanese nula hian Serena hi vawi li a hmachhawn tawh a, vawi thum hnehna a chang.
Osaka chuan, "Dik taka sawi chuan Serena hmachhawn hi ka ngai hlu em em a, ka naupan lai aṭanga ka ngaihsan a ni a, a inkhel hi ka en nasa thei hle. Ani nena court khata khelh dun hi ka tan chuan mumang ram a ni," tiin a khingpui a fak.
Serena hian Australian Open-ah vawi sarih champion tawhin a record hi a chhuanawm hle. Chutihrualin Serena hian 2017-a Australian Open a champion hnuah Grand Slam a la champion leh lo.
American tennis star Serena hian September 2017 khan fanu a nei a, 'nu' a nih hnuah pawh Wimbledon leh US Open-ah ṭum hnih ve ve final lut leh mah se nomawi inchuhnaah a vanduai zawkah a ṭang vek. Serena hi kum 39 mi a nih tawh bawk avangin Margaret Court-i record nihrual hi a harsa ang.
Serena a insawifiah
Osaka hian match 19 chhung hneh loh a tawng tawh lo a, Japanese nula hian inrintawkna a ngah a, Serena erawhin tihsual a ngah thung.
Serena chuan, "Osaka ka hmachhawn vangin ka hlauthawng lo. Tihsual ka ngah avangin ka chak loh phah a ni. Dik taka sawi chuan tihsual nei tlem ilang chuan 5-0 a ni chho thei hial ang. Mahse tihsual ka ngah tlat a ni," tiin tihsual a ngah vanga chak loah a inngai.
AO Thlirna Tawi
MEN'S SINGLES
Semifinal
Nimin Inkhel Result
1. Novak Djokovic bt (6-3, 6-4, 6-2 ) Aslan Karatsev
Vawiin Inkhel Tur
4. Daniil Medvedev 2:00 PM 5. Stefanos Tsitsipas
Final - February 21, Pathianni
1. Novak Djokovic 2:00 PM Medvedev/Tsitsipas
WOMEN'S SINGLES
Semifinal - Nimin Inkhel Results
22. Jennifer Brady bt (6-4, 3-6, 6-4) 25. Karolina Muchova
3. Naomi Osaka bt (6-3, 6-4) 10. Serena Williams
Final - February 20, Inrinni
22. Jennifer Brady 2:00 PM 3. Naomi Osaka
MEN'S DOUBLES
Semifinal
Nimin Inkhel Result
9. Dodig/Polasek bt (4-6, 6-4, 6-3) 2. Pavic/Mektic
Vawiin Inkhel Tur
6. Murray/Soares 7:30 AM 5. Ram/Salisbury
Final - February 21, Pathianni (9:30 AM)
WOMEN'S DOUBLES
Semifinal - February 17, Nilaini
2. Sabalenka/Mertens bt (7-5, 6-4) 4. Schuurs/Melichar
3. Siniakova/Krejcikova bt (6-3, 6-2, 6-4) Jurak/Stojanovic
Final - Vawiin Inkhel Tur
3. Siniakova/Krejcikova 10:30 AM 2. Sabalenka/Mertens
Note : Hming hmaa number awm hi seeded number a ni.