Aizawl FC-in Mohammedan an sawp

Mizo club Aizawl FC-in Kolkata stadium chhuanvawr Salt Lake Stadium-ah khawtual club Mohammedan SC chu 3-0 in an sawp. Nimin inkhelah hian AFC tan Mizo tlangval pathum R. Malsawmtluanga, Lalremsanga Fanai leh Lalliansanga (Notea) ten goal khat ṭheuh an khung.

Yan Law-a hote hian an khelh ṭhat angin an result a ṭha ṭhin lo a, match hnuhnung pathumah chak hmel an hmu lo. Nimin inkhelah erawh AFC-in chetsual nawn an tum lo a, ṭan phat aṭangin an khel ṭha a, chance pawh an ngah hle.

Minute 16-naah Alfred Kemah Jaryan-a freekick hlawhchhuah chu MS-a'n mawi zetin a pet goal a, Mizo club-in inkhel thunun zui mah se first half-ah goal a luh belh lo.

Second half-ah Aizawl FC an khel ṭha chhunzawm a, minute 64-naah Lalremsanga Fanai-in box chhung sir aṭangin kawh zetin goal kilah a pet lut. Minute thumnaah AFC-in ṭum dang ang thoin set piece an hmang ṭangkai a, corner kick-a ball an inpass kual hnua an vawrhluh chu Notea'n a tauh lut.

Aizawl FC-in hnehna an chan avangin match riat aṭangin point 12 an hmu a, palinaah an invawrhchho. Yan Law-a hote hian Real Kashmir leh Chennai City an la hmachhawn dawn a, champion beiseina a la sang hle. Nimin tlai table chunglam pahnih inkhelah Real Kashmir leh RoundGlass Punjab  te 1-1 in an inhnehtawk a, Punjab-in point 15 hmuin pakhatna an ni chhhunzawm a ni.