Mi bik 100 thlan zingah Rashford

Kar tin chhuak American chanchinbu Time Magazine chuan 'The Next 100 Most Influence People' an thlang chhuak a, Marcus Rasford a tel. Manchester United leh England forward hlui Rashford an telh chhan hi naupang retheite tana a hnathawh vang a ni.

Naupang rethei tana a hnathawh avang hian Rashford hian nikum khan British rama chawimawina sang MBE a dawng tawh a, BBC Sports Personality of the Year-ah special award pek a ni bawk. Time Magazine-in mi 100 dang a thlanchhuahte hi infiammite, entertainer-te leh ram hruaitute an ni hlawm.

Rashford-a chanchin ziak tur hian Formula One vawi sarih champion tawh Lewis Hamilton thlan a ni a, Hamilton chuan, "Mi hriat a hlawhna hmang ṭangkaiin khawtlanga mi der dep berte tan a pen chhuak a, a ṭha zawngin danglamna a siam a ni. Marcus hian a hnathawh hmangin mi ṭhahnem tak rilru a thlak a, a entawn tlak hle.

"Kum khat chhung lekin thawhhona ṭha chuan rah ṭha a thlen tih a pholang a, a thawhrimna avangin UK-ah chuan naupang rilṭam an awm lohna turin mipuiin theihtawp an chhuah phah. A tumruhna te, tlawm duh lohna te leh beih hram hramna te chuan mi rilru a hneh a, he hna pawimawh tak a thawh chhunzawm dan turah duhsakna ka hlan," tiin chhuang takin Man United forward chungchang hi a ziak.

Rashford hian naupang rethei zawk ten chhun chaw an ei theih nan 'petition' a siam a, October thla a nih chuan kut ziak hmanga thlawptu mi maktaduai khat an tling tawh. Mipuiin na taka an nawr avangin sorkarin thlasik chhunga naupang chhun chaw ei tur an pek phah a,  Man United forward hnathawh hi a ropui hle.