Bayern Munich-in goal an surtir

Buaina lian tak karah Bayern Munich chuan an mikhualna ramah Hoffenheim 6-0 in an sawp. Inrinni zan inkhelah fans lamin Hoffenheim president Dietmar Hopp duh lohna an lantir nasat avangin chawlh lailawk a ngai hial.

Inkhel dangah rawlthar Jadon Sancho goal hmangin Borussia Dortmund chuan Freiburg 1-0 in an hneh a, Bundesliga nomawi inchuh boruak a sang zel. Nizan khan pahnihna RB Leipzig inlanin he thu buatsaih lai hian result kan hre hman lo.

Hoffenheim khelmualah Bayern ral a lian, German champion tan hian Philippe Coutinho-a'n goal hnih a khung bakah Serge Gnabry, Joshua Kimmich, Joshua Zirkzee leh Leon Goretzka te chuan goal khat ṭheuh an khung.

Bundesliga hmahruaitu Bayern hi Champions League-a Chelsea 3-0 a sawp hlim an ni a, English club an sawp hnua an league match hmasa berah striker Robert Lewandowski chu hliam vangin chhawr thei lo mah se buaina an nei lo.

A zawna season ruk chhung German champion ni tawh hian league match 24 khelh tawhah point 52 hmuin a chung berah an awm, anmahni aia match khata khel tlem zawk Leipzig nen an inkarah point li a awm mek.

Rhein-Neckar-Arena-a inkhelah hun tawp lam minute 20 chu tihtawp lailawk a ngai a, minute 77-na aṭangin khelh ṭan leh ni mah se player-te hi competitive taka inkhel chhun­zawm loin hun tawp thlengin ball an inpe kual mai mai. 

Referee Christian Din­gert-a'n inkhel a tih tawp lailawk chhan chi fans lamin Hoffenheim president Dietmar Hopp duh lohna leh tih elna thuziak an tarchhuah hnem vang a ni. Bayern sporting director Hasan Salihamidzic leh board member Oliver Kahn ten fans khap daih duh mah se awmzia a nei hleih theih loh vang a ni.

Bundesliga-ah hian '50+1' dan hman a ni a, hemi dan hnuaiah hian mi pakhatin club pakhatah chanvo 50% aia tam a nei thei lo. German mi hausa Hopp hian 2000 aṭang khan Hoffenheim hi a siam lian. Kum 2015 khan Hopp hi club-a chanvo tam zawk nei thei turin club chhunga thuneitu tam zawkin an duh a, tun thlengin he thu hian sawisel a hlawh chhunzawm.

Bayern fans lam thiltih vangin club thuneitu ten pawi an ti a, club chief executive Karl-Heinz Rummenigge chuan, "Dietmar Hopp chunga thil thleng kha a pawi ka ti, hei hian football hmai a ti bal ṭhin. Buaina siamtute kha chhinchhiah an ni a, hmalak zui a ni ang, hetiang nungchang neite tan hian stadium-ah hmun siamsak tur a ni lo ang," tiin fans chet dan a dem thu a sawi.

Bayern Munich chauh hi hetianga buaina siam an ni lo, kar hmasa khan Borussia Monchengladbach fans lamin duh lohna an lantir tawh avangin an inkhel chu tihtawp lailawk a lo ni tawh bawk. February thlatir khan Dort­mund pawhin buaina an lo siam tawh, Dortmund lakah hremna chhuak chu a na hle. Season hnih lo awm leh tur chu Hoffenheim muala an lenluhah fans an nei thei dawn lo - Bayern pawh hremna hmachhawn thei dinhmunah an ding.