India hnehtu England beiseina a nung thar

Cricket World Cup-ah England chuan Pathianni khan Jonny Bairstow century hmangin India chu run 31 in an hneh a, semifinal luh theihna kawng a inhawng zau sawt.

Edgbaston, Birmingham-ah ṭhumvawra chak England captain Eoin Morgan chuan bat hmasak a thlang a, inelna thlengtu hian run 337 zet an vaw chhuak. India bowler ṭha Jasprit Bumrah leh Mohammed Shami ten a tir lamah wicket lak an harsat a, Jonny Bairstow leh Jason Roy te inkawpin run 160 zet an siam hman.

Wicket la thei Shami-a'n wicket nga zet la tho mah se run a pe hnem a, England tan Ben Stokes-a'n ball 54 lekah run 79 vaw chhuakin dinhmun ṭhaah an awm. India tan batting pitch-a run 337 um phak chu thil theih a ni.

Amaherawhchu KL Rahul out hma lutuk te, century siam Rohit Sharma leh half century siam Virat Kohli ten run an siam tam nachungin ball an mamawh tam a, a tir over 10-a run 28 chauh an siam thei chu an chak lohna chhan bulpui tiin a sawi theih. India hian a tir aṭanga a tawp thlengin an mamawh zat run rate phak lai an nei lo a, over 50-ah 306/5 siamin England aiin run 31 in an siam tlem.

England hi semifinal lut turin July 3-a  New Zealand an hmachhawn hunah an chak a ngai a, hnehna an chang zo lo a nih erawh chuan July 5-a Bangladesh leh Pakistan inkhel result an nghah a  ṭul ang. A nihna tak thlir erawh chuan Eoin Morgan hote hi an chak lo a nih chuan an tlak a rinawm zawk.

India erawhin vawiin hian Bangladesh an hmachhawn dawn a, Sri Lanka an la khelh dawn avangin semifinal lut ngei tura ngaih an ni.