Durant-a'n Brooklyn Nets pan dawn

Kevin Durant chuan Golden State Warriors kalsanin Brooklyn Nets a zawm dawn a, American star hian contract la ziak fel chiah lo mah se Nets a zawm tur thu hi Instagram lamah a tarlang tawh a ni.

Kum 30 mi Durant hi Warriors tan NBA Finals a khelhna lamah a ke artui a hliam mek, a hliam hi enkawl rei a ngaih dawn avangin season thar hi chu a khelh theih a beiseiawm loh. Hetichung hian Nets chuan kum li chhung atan dollar maktaduai 164 velin inremna an neihpui. Season hmasa lama a khelhna GSW khan kum nga chhung atan dollar maktaduai 221-in inremna neihpui duh mah se chona thar hmachhawn a thlang ta zawk.

Nets hian sum tam tak sengin team thuam chak an tum mek, Durant bakah hian guard Kyrie Irving leh centre DeAndre Jordan te lak an la tum bawk. Player langsar pathum an huikhawm kim a nih chuan NBA champion thei tura rinkai zingah an tel pha ang.