European Under-21 Championship Germany ngamtu Spain-in an thiam ber

Europe-a kum 21 hnuai lam inelna European Under-21 Championship chu khelh zawh a ni ta a, Spain chuan 2-1 a Germany hnehin an champion. 

Spain tan Fabian Ruiz leh Dani Olmo ten goal khat ve ve an khung a, Nadiem Amiri chuan si phurh rawn sut ṭhen ve mah se goal-a khung hi minute 88-na a nih tawh avangin an 'comeback' thei lo. 

Final khelh hmaa goal sarih khung tawh German striker  Luca Waldschmidt-a'n hun pawimawh ber 'final'-ah goal a khung thei lo a, goal riat khunga Euro U21 tournament khata goal khung hnem ber record siam theihna remchang a neih chu a bawhpelh tel nghal bawk.

Pathianni zana final inkhelah Spain-in goal khung turin hun an mamawh rei lo. Fabian Ruiz chuan minute sarihnaah ṭha taka ball a tlan luhpui hnuin shot a nei a, German keeper Alexander Nubel tan dan rual a ni lo. 

Spain-in inkhel an thunun chhunzawm a, Germany lam an che thei meuh lo. Goal hnihna erawh minute 69-naah a lut leh chauh a, Germany keeper Nubel chetsual zar a ni. Schalke goalkeeper hian Ruiz-a goal shot a man nghet zo lo a, a per lehlam chu Dani Olmo chuan harsatna nei loin goal-ah a chantir. 

Hun tawp nan minute hnih chauh a awm tawh tihah Amiri chuan Germany tan si phurh a rawn sut ṭhen a, German rawlthar rual harhtharna thlen tur erawhin hun a tlem tawh hret. 

Germany an vanduai tia sawi theih a ni bawk a, Spain defender Jesus Vallejo chu hlauhawm takin Luca Waldschmidt lakah a foul - hnawhchhuah ngei tura ngaih a ni. Mahse, referee-in video assistant referee a rawn hnuah pawh yellow card pekna tur khawp bak niin a hre lo. First half thil thlengah hian red card phawrh ni se chuan result hi a danglam thei hial ang. 

Euro U21 Championships-ah hian ram 12 an inel a, group pathumah team pali zelin ṭhen an ni. Group tina hmahruaitu ṭheuh hian semifinal an lut nghal a, pahnihna pathum zinga tiṭha ber an lut ve bawk.

Semifinal lut team France, Germany, Romania leh Spain te chu 2020 Summer Olympics-a mipa football khel turin an tling nghal. England chu boruak nei lian ber pawl ni mah se Croatia 3-3 a an inhnehtawkpui tih loh chu Romania leh France an ngam lo ve ve a, point khat chiah nei chungin an tla.