Match 100 chak beiseitu Federer

Roger Federer tan Wimbledon-ah match 100 chak theihna hun a inhawng chho mek a, mellung pawimawh phun tur hian vawi nga chak a la hmabak. Swiss star hian zaninah first round a khel dawn a, seeded chang phak lo Lloyd Harris nen an inhmachhawn ang.

Tennis player zingah Grand Slam pakhata match 100 chak tling thei hi an la awm ngai lo. Mahse, kum­inah Federer hian semi­final a thleng a nih chuan midangin an tih theih ngai loh a ti dawn a ni. Wimbledon vawi riat champion tawh Federer chuan, "Thil hi theih loh a awm lo a, theih sa pawh a awm bik chuang lo. Record ngaihtuah hun a ni rih lo a, match hmasa bera chak chauh ka ngaihtuah rih ang," a ti.

Kum 37 mi Federer hi All England Club-ah hian world number 3 a nichungin seeded pahnihna pek a ni a, a kaltluang a nih pawhin final hma chuan Novak Djokovic emaw Rafael Nadal a hmachhawn thei dawn lo tihna a ni.