Brazil-in Messi leh Argentina dan tum

Argentina mipui ten hun rei tak chhung Lionel Messi-a'n an ram tana nomawi lian a pet chhuak lai an nghak tawh a, tun thlengin an la nghak chhuak lo. Copa America-ah hian an nghak chhuak dawn em tih chu hun rei lote chhungin a hriat dawn.

Nilaini zing dar 6:30 hian Governor Magalhaes Pinto Stadium-ah Argentina-in inelna thlengtu Brazil chu semifinal-ah an hmachhawn dawn a, ram pahnih hian player ṭha an kawl hnem avangin chak zawk tur sawi lawk a harsa.

Brazil defender Thiago Silva-a'n Lionel Messi thiamzia a hrechiang a, tun ṭuma an intawn hunah pawh Ballon d'Or chawimawina vawi nga dawng tawhtu hi an thlah fal loh tur thu a sawi.

Kum 34 mi Silva chuan, "Khawvel player zingah Messi hi a ṭha ber, ani hi midang zawng aia kan ven uluk tur a ni. Ball a chang emaw chang lo pawh ni se a hlauhawm reng, club leh ram team anga ka hmachhawn tawhah pawh kan zir leh inbuatsaihna piah lamah thil mak a rawn thlentir ṭhin," tiin Messi a dahsang thiam a, pressure siamsak a tum bawk.

Brazil hian tun Copa America-ah hian goal an la chhuah miah lo a, goal khat chauh la khung Messi hi an hlauh tak tak erawh rinawm loh. Silva chuan, "Centre back nih chuan thil thleng thei ngaihtuah ngai a tam, a tlangpui thuin Messi hi vei lamah a hlauhawm, chutihrualin dinglama hmun pek chi a ni chuang lo," tiin ven hleih theih a nih loh thu a sawi.

Argentina leh Brazil hi Copa America 2007 final khan an intawng a, world champion vawi nga ni tawh Brazil hian 3-0 in hnehna an chang. Tun ṭum hi Copa bikah chuan an inkhelh lehna hmasa ber tur a ni ang.

Argentina striker Sergio Aguero-a'n Brazil tlarhnung khawngzia a hrechiang a, ram lian pahnih inkhel hi a awlsam dawn loh thu a sawi. Manchester City hmatawng hi manager Lionel Scaloni-a'n tlarhma lama a rin ber a ni mek.

Aguero chuan, "Kan ram jersey a hlutna ang ngei ha chhuak turin theihtawp kan chhuah ang. Argentina leh Brazil hi an inkhel zen zen lo, mipui lam aṭangin beiseina pawh a sang, kan ramah chauh ni loin khawvel pumin min en dawn. A harsa dawn hle a, chutihrualin semifinal kan thlen tawh avangin tawp mai kan tum lo," a ti.

Tite enkawl Brazil-in beisei angin khel chhuak rih lo mah se team nghet bera ngaih an ni a, anmahni rama inkhel an nih bawk avangin rin pawh an hlawh. Coach Titea-a'n, "Copa America-ah chuan final luh hi kan tum hniam ber a ni ang," tiin semifinal-a tawp a tum lo.

Neymar awm lo mah se Brazil hian tlarhma lamah Roberto Firmino, Philippe Coutinho leh Gabriel Jesus te an la nei tho a, an khelh fuh ni chuan dan an harsa. Tlarhnung khawng lo ve tak Argentina chhaih buai turin an ṭha tawk hle tura ngaih a ni.