Jeho-a'n silver medal a la

Mizo rawlthar table tennis khel thiam Jeho Himnakulhpuingheta chuan, National Ranking Table Tennis Championships (North Zone) khelh zawh taka Junior Boys huangah silver medal a vaw chhuak.

Sonepat, Haryana-a inelna neihah Jeho-a hi inelna hmachhawn zinga ranking sang pariat zingah a tel lo a, qualifying aṭangin a khelh ṭan a ngai. Main draw in vaw kai tur hian match hnih hnehna a chang hmasa phawt.

First round-ah Druv Vats (Haryana) chu 3-0 in a hneh a, second round-ah Nagle Rithrik (Maharashtra) 3-0, last 16-ah Varun Ganesh (Tamil Nadu) 3-0, quarterfinal-ah Chinmaya Somaiya (Maharastra) 4-1 in a hneh vek.

Semifinal inkhel hmuhnawm takah Delhi rawlthar Shreyans Goel lakah 3-0 ngawta a hnufual hnuin 4-3 in a tho chhuak, he inkhelah hian harsa taka point neih a tumna lamah dive-in a ke dinglamah hliam a tuar. Final lut mah se inkhel pawimawh takah Tamil Nadu aiawhtu Viswa Deenayalan lakah 4-3 in an chak lo.

Kum 21 hnuai lam inelna Youth-ah pawh Jeho-a hi a tel a, quarterfinal a paltlang lo. Tun inelna bika a chet ṭhat avangin Lunglei rawlthar hi ranking-ah a sang pali zingah a tel tawh dawn, inelna a hmachhawn leh hunah chuan qualifier khelh a ngaih dawn loh bakah second round aṭangin a inlan thei dawn a ni.