PSG chakna Kylian Mbappe
Paris St-Germain chuan Kylian Mbappe goal hnih hmangin an mikhual Dijon chu 4-0 in an sawp a, anmahni hnaih bertu Marseille lakah point 13 ngawta an san fal tawh avangin Ligue 1 nomawi an kawl lai an humhim ngei a rinawm.
Inrinni zan Paris khawpuia inkhelah Mbappe bakah Pablo Sarabia leh Mauro Icardi te chuan goal khat ve ve an khung bawk. Mikhual Dijon lamin ball an chang tlem a, goal khung tumin target zawnah vawi thum pet ve mah se an hlawhtling lo.
PSG hian hliam vangin Neymar an la chhawr thei lo, Brazilian forward awm lo mah se goal khung kawngah erawh harsatna an tawk ngai lem lo - France international Mbappe an neih vang a ni. Kum 21 mi Mbappe hian season kal laia league goal 18 a khung leh tawh, ani aia goal khung hnem an awm lo. PSG hian Nilaini zanah French Cup semifinal khel turin Lyon an zin chilh leh nghal ang.