Manchester City-in hma an hruai leh ta

Premier League champion lai Manchester City chuan Nilaini zan khan Goodison Park-ah Everton 2-0 in an hneh a, December 16 hnua a vawi khat nan league hmahruaitu an ni.

Kar khat lek liam ta khan Liverpool-in point nga laiin hma an hruai a, amaherawhchu Jurgen Klopp-a hoten match zawnin an khingpui an inhnehtawkpui a, City hian Reds nena an inkar tihzim nan an hmang ṭangkai ta a ni.

Everton lamah hian Pep Guardiola hote tan Aymeric Laporte leh substitute Gabriel Jesus ten goal an khung.

Everton lakah hian Pep Guardiola chuan Arsenal hnehtute aṭangin Raheem Sterling leh Kevin De Bruyne-te a hahdamtir a, hattrick siamtu Sergio Aguero erawh bul ṭantir a ni. Man City-in bul an ṭan ṭha a, Leroy Sane, Ilkay Gundogan leh Aguero te hlauhawm nghal mah se goal erawh a lut lawk lo.

French defender Aymeric Laporte-a'n corner aṭanga a chance ṭha neih tauh lut lo mah se first half injury time-ah David Silva freekick a tauh lut chiang hle. Second half-ah Sterling rawn lutin an goal nawr na chhunzawm mah se goal hnihna an khung lawk theih loh avangin hun tawp dawn thlengin ngaih ngam takin an awm thei lo.

Injury time minute sarihnaah substitute Gabriel Jesus chuan bench ṭanga lut tho Kevin De Bruyne hnen aṭanga a ball hmuh chu goal-ah petin keeper Jordan Pickford-a'n dan sak mah se a per chu a tauh lut leh hman tho a. Toffees tan thawhchhuah ngaihna a awm tawh lo.

City manager Pep Guardiola chuan, "Liverpool nena kan inthlauhna kha point sarih a tling hman a, tunah erawh table chung berah kan awm leh tawh. Hei hian beidawn duh loh pawimawh zia a ziritir. Thil awm dan hi inthlak thleng thut thut thei a nih avangin infiammi chuan engtik lai pawhin chak a tum tur a ni, " tiin beidawng duh loa an beih hram hram rah an seng thu a sawi.

Spanish manager Pep Guardiola-a'n club panga an la champion theih thu sawi mah se a nihna takah chuan Liverpool nen chauh nomawi an inchuhah a ngaih theih a, pathumna Tottenham Hotspur leh a hnuai lama club ten nomawi an chawi ta zawk a nih chuan thil mak a tling ang.

Manchester City hi squad thlirin champion nawn tura rinkai an ni a, amaherawhchu an fixtures neih dan thlirin ngaihtuahna sen nawn a ṭul thung.

Pep-a hote tan February thla hi a pawimawh dawn a, kartawp hian Gonzalo Higuain leh Eden Hazard te vul lai takin Premier League inkhelah Chelsea an hmachhawn a ṭul dawn.

FA Cup-ah City-in Newport County an tlawh dawn a, Champions League-ah Schalke an hmachhawn chhunzawm ang a, he mi zawh hian League Cup final-ah Chelsea nen bawk an inkhel ang.

Pep-a hote hian FA Cup-a League Two club Newport an hmachhawn hi an vannei a tih theih a, an elpui Liverpool erawhin hahdamna hun atan an hmang tih hriat a ṭha.

Liverpool hian kartawpah Bournemouth an mikhual ang a, FA Cup-a an tlak tawh avangin ni 11 zet an hahchawlh hnuah Bayern  Munich an mikhual leh chauh ang. Chutihrualin Jurgen Klopp-a hote fixtures a awlsam tihna a ni lo, German champion zawh hian an hmelma Manchester United hmachhawn turin Old Trafford an tlawh dawn.

February thla tawpah Reds hi Watford nen an inkhel ang a, March thla ṭan nan Goodison Park-ah Everton nen an inkhel chhunzawm ang. Merseyside derby a nih dawn avangin Liverpool hmachhawn tur Toffees hi chu Man City khelhpui nen team inang ni mah se an tawhkhirh zawk ang. 

Reds hi Krismas laiin hmahruaitu an ni a, tun hma pawhin hetiang dinhmuna vawi thum an din hnuah Premier League nomawi hi an thlauh vek a, tun ṭumah pawh nghet taka an chelh tawh nomawi hi an vuan nghet lo sawt hle.