Santosh Trophy leh Under 21 players

National Football Championship for Santosh Trophy North East Zone Qualifying Round chu February 11-16, 2019 inkar hian Aizawlah khelh a ni dawn a, Mizoram coach Lalsangzuala Hmar chuan Under 21 player dan vangin ngaihtuahna sen uluk a ṭul thu a sawi.

Mizoram hi Group A-ah Meghalaya leh Tripura nen an awm a; Group B-ah Manipur, Assam, Arunachal Pradesh leh Nagaland-te an awm thung. Group khat aṭangin team khat chiahin final round an lut dawn a, NorthEast aṭangin team hnih an tling dawn tihna a ni. 

Santosh Trophy qualifying round-ah hian player 20 a ziahluh theih a, heng zinga panga tal hi Under 21 players an nih a ngai a, starting eleven-ah engtiklai pawhin pahnih an awm reng a ngai.

 Mizoram coach Lalsangzuala Hmar chuan, "Kum hnih liam taa Mizoram team ka enkawl aṭang khan Under 21 dan hi hman ṭan a ni a, ngaihtuahna sen uluk a ṭul khawp mai. Hei hian squad thlan dan thlengin nghawng a nei lian hle," tiin Vanglaini a hrilh.

MPL-a Chanmari FC leh Chhinga Veng FC champion-pui tawhtu Sanga chuan, "Under 21 pahnih luhtir ila, left back-a kan hman kha Under 21 ni se a inhliam a nih chuan helai position-a mi thlak tur hian substitution pahnih siam a ṭul dawn. Chuvangin squad pawh hi fimkhur takin kan la a, position khata mi pahnih lain insiamrem awlsam dan tur kan thlir tel a ni," tiin a sawi.

Mizoram team-ah hian Under 21 player paruk an awm a, chungte chu keeper RS Lallawmzuala, defender C. Lalchhuanmawia, midfield leh goal nawr tura chhawr kawp theih KC Larchhuakmawia, Ramhlunchhunga, K. Roluahpuia leh David Laltlansanga te an nei bawk.

Sanga chuan, "Kan player-te hi an vaiin an chhawr ngam vek a, training kan la neih hmabaka khel ṭha aṭangin first eleven thlan a ṭul ang. An vaiin an dam kim vek a, player thlan pawh a harsa dawn," tiin tumah starting eleven chiang an awm loh thu a sawi.

February 13, Nilaini hian Mizoram-in match hmasa berah Tripura an hmachhawn ang a, group match hnuhnung berah Meghalaya nen February 15, Zirtawpniah an khel zui ang.