FIFA President tur Infantino bawk

Football khawvela thuneitu sang ber FIFA President atan he dinhmun chelhtu nilai Gianni Infantino bawk a ni dawnin a lang a, June-a election neih turah khingtu tur a nei lo.

Kum 48 mi football hruaitu langsar hian February 2016 khan Sepp Blatter thlakin tun dinhmun hi a luah a, amah khing turin Tottenham defender hlui Ramon Vega chuan din a tum thu sawi mah se thlawptu a neih ṭhat tawk loh avangin a ding thei dawn lo. 

FIFA President dinhmun chuh tur hian FIFA hnuaia ram 211 zinga ram panga talin candidate chu an thlawp tih an lantir a ngai a, Vega hian amah thlawptu tur ram panga a hmu zo lo a ni. 

President thlanna hi June 5-ah, hmeichhe World Cup khelh a nih hma ni hnihah neih tur a ni ang. Infantino-a hmalakna langsar zingah World Cup-a team 32 tel ṭhin chu kum 2026 aṭanga team 48-a kaisan tir a tel a, hei hi World Cup 2022 aṭanga hman ṭan hial a duh.