Baggies leh Leeds inhnaih zel

Leeds United-in 4-0 ngawta Hull City an sawp laiin West Brom chuan an mikhual Wigan Athletic 1-0 in an ngam lo thung a, Championship hmahruaitu Baggies leh Leeds inthlauhna hi point khat chauh a ni ta.

Hull khelmualah Leeds tan Tyler Roberts chuan goal hnih a khung a, Luke Ayling leh Valencia attacking midfielder hlui Pablo Hernandez te chuan goal khat ve ve an khung bawk. Mualneitu Hull lamin a chhan letna tur an neih loh avangin Leeds hi 4-0 ngawtin an chak a, automatic promotion hmanga Premier League khelh an beiseina chu tih nunin a awm zel.

Hetihlai hian hmahruaitu West Brom chuan an mikhual Wigan Athletic an ngam lo a, League One lama tlak hlau Wigan tan Sam Morsy chuan inkhela goal awmchhun hi a khung.