Verstappen dah sangtu Red Bull boss

Formula 1 team Red Bull boss Christian Horner chuan an driver duhlai Max Verstappen a dah sang thiam hle a, champion lai Lewis Hamilton pawhin season lo awm leh tur atana a hlauh ber a nih thu a sawi.

Horner hian kum 21 mi Max Verstappen hi driver ropui Hamilton leh Ferrari car khalhtu Sabastian Vettel te elphak tawh turah a ngai, chutih rualin team lamin an thlawp ṭhat chu a ngai dawn hle thung.

Season hmasa driver champion­ship-a palina Verstappen chung­chang sawiin Horner chuan, "Lewis leh Sebastian te elphak turin theihna neih ngai ang zawng zawng chu a nei vek, a nihna takah chuan anni pahnih hian an elpui hautak ber tura an ngaih a nih ka ring," tiin a sawi.

Dutch driver hian season hma­sa khan a tir lamah buaina neuh neuh a nei a, an insiamṭhat hnuah erawh Austria leh Mexico Grand Prix-ah te hnehna chang theiin, championship-a pathumna dinhmun luahtu Kimi Raikkonen a phak lohna chu point hnih chauh a ni.