A tawpah PSG an tlang hram

French Cup champion lai Paris St-Germain chuan last 16 lut turin vanneihna an mamawh tel a, hun pek belh an khelh hnuah third division club Villefranche chu 3-0 in an hneh.

Nilaini zan inkhelah PSG hian ball chang tamin chung­nung zawk viau mah se minute 90 chhung chu Ville­franche tlarhnung an su hawng thei bik lo. Extra time khelh niin, minute 102-ah midfielder Julian Draxler chuan goal hmahruai a khung chauh.

French champion hian an player neih ṭhat ṭhenkhat Kylian Mbappe leh Edison Cavani te bench aṭangin an dah lut a, Uruguay inter­national Cavani leh Moussa Diaby ten an goal hnuhnung pahnih khungin a thiam 16 zingah an inhlangkai.

Rawlthar duhawm Mbap­pe-a'n goal khung lo mah se a ṭhiante khung tur vawi hnih a siamsak a, a zawna vawi nga champion an tumna kawngah tha thawhtu pawimawh leh langsar a ni phak tho.

Thomas Tuchel-a enkawl PSG hian tun kar tawp hian Ligue 1 match-ah Bordeaux an hmachhawn dawn a, February 13 hian Manchester United nen Champions League last 16 first leg an khel ang - United lakah hian an thiampuipa Neymar an chhawr thei dawn lo, hei vang hian player ṭha ṭhenkhat hi an tha khek a ngai zual a ni.

German manager Tuchel chuan, "Kylian chungah hian mawhphurhna sang tak pek ka duh lem lo, a ṭhiante tan a ṭangkai thei ang ber turin nuam ti takin khel se ka duh a ni mai, inlan thei lo Neymar aiawh tur anga ngaih chi erawh a ni lo ang. Ani leh Cavani te an inkawp thei a nih chuan Man United tan pawh dan an awl­sam dawn bik lo," tiin a sawi.