Chak zawk awm lohna El Clasico

Copa del Rey semifinal first leg-ah Nilaini zan khan Barcelona chuan Real Madrid an mikhual a, goal khat ve ve khungin an inhnehtawk. 

'El Clasico' tia khawvelin a hriat, Spanish football-a club pahnih inkhel hian ngaihven a hlawh ṭhin a, Nilaini zanah pawh ngaihven a hlawh ang ngeiin inkhel a hmuhnawm. 

Real tana Lucas Vazquez goal hmahruai khung chu Barca tan hmun chang tam lo tak Malcom-a'n a hming chher nan hmangin a sut a, goal dang erawh a lut tawh lo. 

Barcelona tan hliam vanga dinhmun chiang lo Lionel Messi chu bench-ah dah a ni a, Argentine forward hi minute 63-naah luhtir ni mah se danglamna a thlen thei bik lo - Barca tan second leg a harsa sawt dawn. 

El Clasico a nih tawh chuan an inhmachhawnna chu eng 'level' pawh ni se boruak a te ngai lo a, Nilaini zan inkhel bikah chuan Real Madrid aiin Barcelona chu chak tura beisei an ni. 

Mahse, rin loh takin a nghing hmasa zawk chu Barcelona an ni a, an khelmual Nou Camp-ah minute rukna lekah an reh duk - Lucas Vazquez chuan Real tan goal hmahruai a khung.

Real tana Vazquez goal hmahruai khung hi Karim Benzema ball siamsak ṭha zet aṭanga lut a ni a, tun hnaia che ṭha tak French striker-in goal a khung loh ṭumah pawh assist a nei ṭha hle. 

Barcelona-in goal an chhuah hma avangin an talbuai a, hmun chang khat tak Malcom-a'n beisei aia ṭhain bul ṭan mah se a ṭhiante an khelh ṭhat miau loh avangin Real an chhaih mangang thei lo. 

Barca-in an si phurh sut loin chawlh lawk an hmang a, mahni muala Real ngam loh hi Catalan club ṭantute tan a na a, chhantu an mamawh - fan-ten bench-a Messi ṭhutna lam an hawi. 

Mahse, minute 57-naa Barcelona si phurh suttu chu an beisei loh player a ni a, a hming chu Malcom a ni. Kum 21 mi forward hian Bordeaux aṭanga Barca a pan hnuah hmun a chang phak meuh lo. 

Mahse, El Clasico-ah, Copa del Rey semifinal-ah lehnghal hun ṭha pek a ni a, a hun neih a bawh pelh lo chiang hle - Luis Suarez goal shot per lehlam chu mawi zetin goal kir sirah a thlawh lut. 

Malcom hian first half minute 31-naah freekick ṭha zetin a pet tawh bawk a, mahse he a freekick fing tak aṭanga ball kal chu Ivan Rakitic-a'n bar tauh per nan a hmang. 

Barca-in an si phurh an sut hnuah coach Ernesto Valverde-a'n chak a duh tih pholangin Lionel Messi chu bench aṭangin a luhtir a, Argentine forward hi rawn hlauhawm ṭhin viau mah se goal a keng tel lo. 

Nikum October-ah khan La Liga-ah Barcelona hian 5-1 in Real hi an sawp a, Nilaini zan an inkhel aṭanga thlir chuan Madrid khaw club hi an insiamṭha hle tih a lang - rawlthar duhawm Vinícius Júnior a hmuhnawm ṭhin hle. 

Hriat tel atana ṭha erawh Barcelona hi Santiago Bernabeu-ah an la lenglut leh dawn a, Real hi dinhmun ṭha zawk ni rih mah se Messi dam chiang ngei hruai telin Barca an inlan ang a, a harsa ang - he team hian quarterfinal-ah Sevilla 2-0 a an ngam loh hnuin 6-1 in an hneh let leh tih theihnghilh a thiang lo. 

Real Madrid hian Inrinniah La Liga match khelin Madrid derby an hmachhawn lehnghal dawn a, Barcelona erawh an fixture awlsam hretin Athletic Bilbao chu Pathianni zanah an lenchilh ang.