New York khawpuia inlan tur Joshua

British boxer rothap Anthony Joshua  promoter Eddie Hearn chuan a boxer chu New York-a inhnek hmachhawn ngei turin a inpeih hnai tawh niin a sawi a, American boxer Jarrell Miller nen inbiakna an kalpui mek. 

Joshua hian a tirah tak chuan Wembley-a inhnek hmachhawn turin stadium hmingthang hi a hauh fel vek tawh a, mahse boxing khawvela hming chher tak tak tur chuan USA lam a hawi a ngaih thu an sawi vel karah a ngaihdan a sawhsawn leh ta niin a lang.

Hearn chuan, "Joshua career-ah chuan hun pawimawh tak a ni dawn. New York khawpuiah hun danglam a thlen tir dawn a, US boxing khawvel sawinghing lawih khawpin ava che dawn a ni," a ti.

Kum 29 mi boxer hian US-ah inhnek a hmachhawn a nih chuan an inbeihna tur hmun hi Madison Square Garden a ni dawn a, June 1 emaw June 8 chu a hun atana an beisei a ni. 

Joshua hmachhawn tur Miller hian vawi 24 inhnek a hmachhawn tawhah la tlawm miah lo mah se Joshua te ang 'level' la hmachhawn lo a nih avangin Joshua hian amah hmachhawn tur boxer a thlanna kawngah sawisel a tawk nasa hle. 

British boxer hi Wembley stadium-a hauh tih hriat a nih rual khan Deontay Wilder leh Tyson Fury inhneka chak zawk hmachhawn tura ngaih a ni a, mahse boxer pahnih hi rematch nei tura tih an nih takah chuan Joshua hian boxer dang a thlang ta niin a lang.