Liverpool an tlawm - aw, an tlawm!

"Tlawm nei loin Liverpool an champion thei ang em?" tia zawhna chu zawh nawn a ngai ta lo. Inrinni zan khan a chhanna pek kan ni a, chhanna min petu chu Premier League club 'tenau' Watford an ni. 

Tun season-a Premier League match 27 zet a zawna an tlawm tawh loh hnuah Liverpool-in ngam loh val an tawng a, Championship lama tlak hlaua talbuai mek Watford chuan 3-0 in an lo hneh. Hei hi a ni football mawi­na chu - tlak hlau team-in Euro­pean champion an hneh a, foot­ball khawvel an sawi nghing. Vicarage Road-a in­khela lang­sar chu Mohamed Salah, Roberto Firmino leh Sadio Mane ni loin Ismaila Sarr a ni. 

Sarr hian goal hnih a khung a, Troy Deeney chuan goal khat a thawh ve bawk. Liverpool-in a chhan letna tur an nei lo a, tun season-a a vawi khat nan Premier League-ah an tlawm. 

Premier League match 18 chhung chu a zawnin Liverpool an chak tawh a, Watford lakah hian hnehna an chang leh a nih chuan a zawna vawi 19 chakin English top flight football record thar an siam ang. 

Liverpool-in record an siam loh ringtu an awm lo. Watford-a inkhel en tum an tam a, 'history' a tel ve ngei duhin media lam pawhin a hmuna he inkhel report thei turin 'press accreditation' an dil nasa - a daih lo hial. Mahse, record thar hmuh tuma pungkhawm ten kawng tinrenga Liverpool hnuaichhiah an ni lai an hmu ta zawk a, Merseyside club ropuina niloin Sarr-a ropuina tem tir an ni. 

Reds tan a changtupa chu goalkeeper rinawm Alisson a ni a, Brazilian keeper a langsar chunga goal thum an chhuah hian inkhel dinhmun chiang takin a hrilhfiah. 

Atletico Madrid lakah Liverpool an tlawm tawh a, Diego Simeone-a defen­sive game mawi leh coun­ter attacking football hmuh­nawm tak chu an dawl zo lo. Champions League-a an tlawm hnuah Liverpool an insiamṭha lo. West Ham-in huaisen takin attacking football nen an hmachhawn a, hun tawp lamah vanneiin 3-2 in an chak hram. 

Watford player-ten Ham­mers inkhel an en ngei niin a lang - a tir aṭangin huaisen takin an nawr a, Reds an talbuai hneh hle. Second half-ah Sarr chuan goal hnih a rawn khung a, minute 72-naah Deeney chuan a belhchhah.  Liverpool tlarhma hmuh­­nawm ṭhin kha an awm ta lo emaw tih mai a awl a, defending lah duh­thusamin a pherh a, Watford hmaah Liver­pool an talbuai tluan chhuak zak a ni ber.  

Liverpool-in hliam vangin captain Jordan Hen­derson an la chhawr thei lo a, English midfielder tel loin Reds hian ngai an awh lo tih chiang takin a lang - midfield phuar khawmtu an mamawh a, rilru huaisen leh hruaitu ṭha an nei lo. 

Tlarhnung laia a khelh danah Dejan Lovren-a'n chhuan tur a neih lohzia a inhmu ngeiin a rinawm a, Croatian defender hi fitness lama harsatna tawk Joe Gomez aia luhtir a ni. 

Mahse, Lovren hi a dinpui Virgil van Dijk 'level' a ni lo tih chiang takin a lang a, Dutch defender Van Dijk-a'n Gomez nena paltlang hleih theih loh tlarhnung a rem kha hmuh tur a awm lo. Watford an tlangnel hle. Liverpool hi an tlachhe ta duaia ngaih tur erawh a ni lo - league match 28-ah a vawi khat nan an tlawm ve chauh a, an beisei ivincibles record nei ve dawn ta lo mah se an kut nomawi awm nan match tam a ngai tawh lo.