China-ah Hamsik kal rih dawn lo

Napoli midfielder Marek Hamsik chu Chinese Super League lama kal tur angin ruahmanna siam hman ni mah se Napoli chuan inbiakna chu chawlhsan rih a nih thu an puang. 

Kum 31 mi midfielder hi eng club nen ber nge an indawr sawi ni lo mah se khawthlang media te chuan Dalian Yifang nen an indawr niin an sawi.

Napoli chuan, "China-a Hamsik kalna tur chu tih khawtlai rih a ni a, hei hi a tira sum chungchanga inremna awm sa anga kal a nih loh vang a ni," an ti. 

Hamsik hian 2007 khan Brescia aṭangin Napoli hi a pan a, Serie A club tan hian match 520-ah goal 121 khungin Napoli tana goal khung hnem ber ni ṭhin Diego Maradona (115) a khum tawh a, Napoli tana inlan hnem ber ni reng ṭhin Giuseppe Bruscolotti (511) chu November khan a khum tawh bawk.