MangṬha Invincibles

Ni 422 hnuah Premier League-ah Liverpool an tlawm a, season hmasa nen chhiar tela league match 44 tlawm loa an kal tawh chu a tawp zui bawk - Reds hian Arsenal top flight record chu match nga lekin an phak lo. 

January 2019 hnua a vawi khat nana Premier League-a tlawm Liverpool hian 'invincibles season' hman an tum chu an hlawhtlintir thei ta lo a, Arsenal nen huang khata dah an rem ta lo - an la ui dawn chauh! Arsenal hian 2003-04 season khan tlawm nei loin Premier League nomawi an lo chawi tawh a, Arsene Wenger hoa an record ropui hi tun thlengin titi tui berah Gunners ṭantute chuan an nei. 

Inrinni zana Liverpool tlawm rualin Arsenal hian twitter lamah, "Phew..." tiin an hahdam tak thu an pholang a, an record duhawm tak nihrual mai theiha awm reng an hum ta chu an lawm hle. Mahse Liverpool hian record ropui tak tak siam theih dan an la nei -  chawhrualin match khata point an hmuh zat hi 2.82 a ni a, hetiang renga an kal theih chuan point 107 nei chungin season an khar ang. 

Liverpool hian point 107 an nei thei a nih chuan European football-a point heti zat hmu chunga season khar thei hmasa ber record a ni dawn - record dinglai hi point 106 a ni a, Celtic-in 2016-17 season-a an siam a ni. Jurgen Klopp-a naute hian point 22-in hma an la hruai fal mek bawk a, anmahni hnaihtu ber City aiin match khatin an khel tam thung - match 10 khelh tur an la neihah champion turin point 12 chauh an mamawh tawh.